Ärmänstanda ğomüm saylaw uzdı

20nçe iyun’ könne Ärmänstanda waqıtınnan alda ğomüm saylaw uzdı. 21 partiya häm 4 ittifaq yarışqan saylaw näticälärenä kürä xaqimiyättäge Grajdan kileşü partiyase tawışlarnıñ 53,91%ın cıyıp, ciñüen iğlan itte. Oppoziŝiyadäge Robert Koçeryan citäklägän Ärmänstan İttifaqı tawışlarnıñ 21,09%ın cıydı. Êlekke däwlät başlığı Serj Sarkisyannıñ Tözekländerü bar ittifaqı 5,22% cıyıp, parlamentka kerü xoquqına ireşkän öçençe partiya buldı. 2 million 600 meñ saylawçı terkälgän ildä ğomüm saylawda qatnaşu küläme 49,39% bularaq çınğa aştı. Grajdan kileşü partiyase bu saylawda iñ zur xuplawnı provinŝiyadan aldı häm parlamenttağı 105 urınnan 71enä iyä buldı. Oppoziŝiya saylaw näticälären tanımadı läkin qabat sanawda xäzergä näticägä täêsir itäçäk wazğıyät’ bulmadı. Xalıqara küzätüçelär saylawnıñ qanunnarnı bozmıyça uzuın belderde.

44 kön barğan Tawlı Qarabax suğışında ciñelüen qabul itkän prem’yer-ministrı Nikol Paşinyan oppoziŝiyaneñ mitingları näticäsendä waqıtınnan alda saylaw ütkärergä mäcbür qalğan ide. Bu barışta Ğomüm ştab başlığı Onik Gasparyan da prem’yer Paşinyannı wazıyfadan kitärgä çaqırdı, ğaskärilärneñ bu adımı tüntäreleş kereşüe bularaq kürelgän ide. İlbaşı idaräse dä Paşinyannıñ wazıyfadan kitüen telägän ide.

Şaqtıy belgeç bu täraqqıyät’lärdän soñ Paşinyannıñ saylawda ciñeläçägen yäisä tawışlarınıñ kimiyäçägen uyladı läkin ärmän xalqı Paşinyannı qabat xaqmiyätkä kiterde. Monıñ iñ zur säbäbe bularaq ärmännärneñ awır, izolyaŝiyada yäşäw şartları, suğıştan qotılırğa teläwläre, tınıçlıq häm xozur urnaşqan ildä yäşärgä teläwlären kürsätep bula. Saylaw näticälären tübändägeçä añlatıp bula: ärmän xalqı ayıruça Gruziya häm Törkiyädän täêsirlänä, kiläçäklären töbäk xalqı belän yaqın xezmättäşlektä kürälär.

Qarabax ciñelüe öçen barı tik Paşinyannıñ ğına cawap birmäyäçägen ärmän xalqı bu saylawda ap-açıq itep belderde. Ärmänstannıñ barlıq êlekke säyäsi liderlarınıñ saylawda qatnaşıp, yuğaltuları monıñ kürsätkeçe bulıp tora. Bu saylawda ärmän xalqı höcümçelekkä “yuq” dide. Zäñgär êkrannardağı bäxästä oppoziŝiya liderlarınıñ Paşinyan qarşısına çıqmawı da alar faydasına bulmadı. Şulay da oppoziŝiyaneñ saylaw näticälären qabul itäçägen äytergä irtä. Ärmän säyäsätendä köç yuğaltqan Qarabax klanı ildäge bu yaña barışnı bozu öçen strategiyalar bilgeliyäçäk. Mäsälän, Robert Koçeryan saylaw näticälären Konstituŝiya Mäxkämäsenä cibäräçäklären açıqladı.

Paşinyannıñ saylaw ciñüe çığışında “Kollektiv iminlek kileşü oyışması, Awraziya İqtisadi berlege belän yägni Rusiyä belän mönäsäbätlärne tağın da nığıtaçaqbız” açıqlawı Törkiyä häm Azärbaycan täqdim itkän regional’ 6 yaqlı mäydannıñ alda Ärmänstanda da kön tärtibenä kiläçägen añlata ala. Saylawdan alda da Paşinyan tarafı bu mäs’äläne quzğatqan ide. Grajdan kileşü partiyaseneñ xökümät qoru öçen koaliŝiyağa ixtıyac toymawı kürşeläre belän mönäsäbätlärne cayğa salu öçen mömkinlek bulıp tora. Paşinyan kürşeläre belän mönäsäbätlären yaxşırtıp, il iqtisadın qalqındırmasa, êçke säyäsättäge butalçıqlıq däwam itäçäk.

Avtor - Abdrasul İsakov