Qırğızstan ilbaşı Sadır Caparovnıň Törkiyägä säfäre

Awraziya qaytawazı 77

1658729
Qırğızstan ilbaşı Sadır Caparovnıň Törkiyägä säfäre

 

Qırğızstan ilbaşı Sadır Caparov ağımdağı yılnıň 9 -11 nçe iyün’ könnärendä Törkiyägä berençe säfären yasadı. Anı 9 nçı iyün’dä Änkarada ilbaşı Räcäp Tayyip Ärdoğan tantanalı räweştä qarşı aldı. Alar başta üzara küreşep söyläştelär. Annan soň 5 nçe Törkiyä - Qırğızstan yuğarı däräcäle strategik xezmättäşlek şurası cıyılışı uzdı. Söyläşülärdän soň awıl xucalığı, sälamätlek saqlaw ,mädäniyät, sport kebek ölkälärne üz êçenä alğan 7 kileşü imzalandı.

Şul uq könne 4 nçe Xalıqara Issık kül (Êsse kül) forumın yabu ike il ilbaşı häm alarnıň tormış iptäşläre qatnaşında ütte. Çıňğız Aytmatovnıň mirası buğan Issık kül forumınıň berençe êtabı uzğan yıl Bişkäktä uzğan ide.

Qırğızstan ilbaşı 10 nçı iyün’dä Törkiyä Böyek Millät Mäclese başlığı Mostafa Şäntop belän oçraştı. Alar ike yaqlı häm regional’ mönäsäbätlär turında söyläştelär.

Soňraq Sadır Caparov Törkiyä palatalar häm birjalar berleğendä (TOBB) buldı. Berlekneň iq’tisad häm texnologiya universitetı Caparovqa Maqtawlı doktor iseme birde. Qırğızstan ilbaşı biredä törek êşmäkärlärenä möräcäğät’ itte. Bıyılnıň 8-9 nçı avgust könnärendä Issık küldä Törki şurağa äğ’za däwlätlärneň Êş forumı uza. Caparov törek êşquarların bu forumğa çaqırdı.

Şul uq könne Sadır Caparov Törkiyädäge qırğız diasporası wäkilläre belän oçraştı. Oçraşuda Törkiyädä yäşäwçe qırğızlarnıň problemaları söyläşelde.

Säfär qısalarında Sadır Caparov Törki şura ğomum särqätibe Bagdad Amreyev belän dä oçraştı. Qırğızstan ilbaşınıň Törkiyägä säfäre Kapadokiyağa säyäxät belän tämamlandı.

 Sadır Caparovnıň säfäre belän Törkiyä – Qırğızstan mönäsäbätlärendä yaňa säxifä açıldı. Rusiya belän Qıtaynı tışqı säyäsättä mömkin qadär balanslaw cähätennän Qırğızstan tuğandaş Törkiyä belän tağın da tığız xezmättäşlek başqarırğa tiyeş.

Küptän tügel Tacikstan belän bulğan çik problemalarınnan kürengänçä, Qırğızstannıň saqlanu tarmağında da Törkiyä belän yaňa kileşülär tözüe häm yaňa saqlanu sänäğäte êşlänmäläre aluı kön tärtibendä. Massaküläm mäğ’lümat çaralarında bu problemanıň Änkarada söyläşelüe turında xäbärlär dönya kürde.

Qırğızstan säwdä häm sänäğät’ palatasın Törkiyä palatalar häm birjalar berleğe (TOBB) kebek mäşğul’,aktiv oyışmağa äwerelderü turında kileşü täêmin itelde. Säfär qısalarında Qırğızstannıň Çüy töbägendä oyışqan sänäğät’  zonasın bergäläp  tözü mäs’äläse qabat kütärelde.

Vizit barışında Törkiyä Bişkäktä tözegän häm pandemiya barışında bik küp yärdäme tigän Qırğıstan - Törkiyä Duslıq xastaxanäseneň räsmi açılışın yasaw da söyläşelde. İke il arasındağı kileşü nigezendä Qırğızstanda däwalana almağan awıruçılar Törkiyägä kiterelä. Monnan soň alarnı Qırğızstan -Törkiyä Duslıq xastaxänäsendä däwalaw planlaştırıla.

Qırğızstan Cömhüriyäteneň sälamätlek saqlaw häm sośial’ üseş ministrı Alımkadır Beyşenaliyev 20 qırğız tabibınıň Törkiyädä 2 yıl täcribä tuplaw mäs’äläsendä kileşülären belderde. Qırğızstan -Törkiyä Manas universitetı şulay uq kiläse uqu yılınnan mediśina fakul’tetına studentlar qabu itä başlayaçağın citkerde. Barlıq bu täräqqiyät’lär Qırğızstan -Törkiyä mönäsäbätlären nığıtaçaq.

 

 



Bäyläneşle xäbärlär