Vengriya Urta Aziya belän êlemtälärne arttıra

Awraziya qaytawazı 68

1621902
Vengriya Urta Aziya belän êlemtälärne arttıra

Macarstan (Vengriya) räsmi zatlarınıñ Urta Aziya Cömhüriyätlärenä yasağan säfärläre

Macarstan (Vengriya) Baş ministrı Viktor Orban 29nçı-31nçe mart könnärendä Üzbäkstanğa säfär yasadı. Üzbäkstan İlbaşı Şäwkät Mirziyayev Viktor Orbannı däwlät tantanası belän qarşı aldı. Ütkärelgän söyläşülärdän soñ ike il arasında 10 kileşü imzalandı. Üzbäkstan-Vengriya mönäsäbätläre strategik däräcägä citkerelde. Bank, awıl xucalığı, cirle idarä ölkäsendä anıq adımnar yasaldı. Berençe tapqır Üzbäkstan-Vengriya êş şurası cıyılışı ütkärelde. Säfär qısalarında Rektorlar Forumı oyıştırıldı. Debreśen universitetınıñ Taşkentta filial açuın häm awıl xucalığı, biotexnologiya, daruxanäçelek (farmaśevtika) ölkälärendä belgeç äzerläwne küzdä totqan kileşügä qul quyıldı. İskä töşerep uzıyq: Vengriya här yıl Qazaqstanğa 250, Qırğızstanğa 150 stipendiya belän yuğarı belem alu kvotasın bülep birä.

2021nçe yılnıñ 31nçe mart könne Viktor Orban Törki Kiñäşmäneñ onlayn bularaq oyıştırılğan räsmi bulmağan sammitında qatnaştı häm çığış yasadı.

6nçı-9nçı aprel’ könnärendä isä Vengriya tışqı êşlär häm säwdä ministrı Peter Siyarto Urta Aziya Cömhüriyätlärenä säfär yasadı. Peter Siyarto Qazaqstan, Tacikstan häm Qırğızstan Däwlät başlıqları tarafınnan qabul itelde, bäyläneşle ministrlar belän söyläşülär ütkärde.

Vengriya tışqı êşlär häm säwdä ministrı Peter Siyartonıñ töbäk illärenä säfäre Qazaqstannan başlandı. Peter Siyarto Qazaqstan tışqı êşlär ministrı Muhtar Tleuberdi belän küreşte. Oçraşudan soñ Tleuberdi Astana xalıqara finans üzägendä Vengriyanıñ êksport häm import bankı ofisınıñ açılaçağın citkerde. Peter Siyarto ileneñ Awraziya üseş bankına quşılırğa uylawın belderde. Vengriya tışqı êşlär häm säwdä ministrı Qazaqstannıñ aldınğı êşmäkärläre belän dä küreşep söyläşte.

Peter Siyarto annan soñ Xalıqara törek akademiyasına bardı häm Vengriya belän bäyle bularaq yaña ğına basılğan kitaplarnı tanıtu kiçäsendä qatnaştı.

7nçe aprel’ könne Vengriya tışqı êşlär häm säwdä ministrı Peter Siyarto Tacikstanğa kitte. Duşanbedä Peter Siyarto Vengriya maqtawlı konsullığınıñ açılışın yasadı. Şuşı uq könne Vengriya-Tacikstan kapital salu forumı oyıştırıldı.

Peter Siyarto 8nçe aprel’ könne Tacikstannan Qırğızstanğa uzdı. Ütkärelgän söyläşülärdän soñ Bişkäktäge Vengriya ilçelegeneñ yaqın waqıtta qayber Awrupa Berlege illäre öçen viza birä başlayaçağı, Qırğızstannıñ Budapeştta ilçelek açaçağı citkerelde. İke il arasında 5 kileşügä qul quyıldı. Kileşülär arasında 50 million dollar rezerv belän tözeläçäk Qırğızstan-Vengriya fondı da bar.

Vengriya Baş ministrı häm Vengriya tışqı êşlär häm säwdä ministrınıñ Urta Aziya Cömhüriyätlärenä säfärläre bik näticäle buldı, dip äytergä bula. Vengriyanıñ Urta Aziya Cömhüriyätläre, törki dönya belän mönäsäbätläre nığıy bara.

Vengriya - Urta Aziya illäreneñ strategik urtağı bulğan häm Rusiyä, häm dä Törkiyä belän bik yaxşı mönäsäbätlär urnaştırğan. Şuña kürä dä Vengriyanıñ Urta Aziya illäre belän mönäsäbätläreneñ qısqa waqıtta iñ yuğarı däräcägä kütäreläçägen äytergä mömkin. Urta Aziya Cömhüriyätläre cähätennän Vengriya – Awrupa Berlege öçen açılğan qapqa wazğiyätendä. Törki Kiñäşmäneñ Budapeşt wäkilçelege – monıñ täwge adımı bularaq bäyälä alına.

Abdrasul İsakov



Bäyläneşle xäbärlär