Törkiyäneñ dronnarı suğışlarnı üzgärtä

Könüzäk mäs'älälär - 67

1617465
Törkiyäneñ dronnarı suğışlarnı üzgärtä

Dön’ya matbuğatında Törkiyäneñ qorallı dronnarı häm alarnıñ uñışı kön üzägennän töşmi. Süriyädä, Liviyädä häm Tawlı Qarabaxta Törek saqlanu sänäğate çığarğan keşesez qorallı oçu apparatlarınıñ yaña suğış doktrinası bularaq näticäle qullanıluı bik küp armiyälärneñ iğ’tibarın cälep itte. AQŞ, Angliyä şikelle däwlätlär dronnarğa tayanuçı bu yaña xärbi konśeptnı tikşerä başladı.

Törkiyä inde küptännän milli qurqınıçsızlıqnı qaqşatırğa mataşular belän oçraşa başladı. İl terrorçı oyışmalarnıñ assimetrik yanawları, geografik urnaşuı belän bäyle ğadäti täşwişlärgä qarşı yaña suğış doktrinası uylap taptı. Dronnarğa nigezlängän älege doktrina xäzerge waqıtta böten dön’yanıñ iğ’tibarın cälep itä. Ul “zamança suğış täğ’limatları”n töptän üzgärtä ala.  

Törkiyä soñğı 10 yılda saqlanu sänäğate mäydanında zur alğarış täêmin itte. Bigräk tä, qorallı häm qoralsız dronnar texnologiyäse tarmağında dön’yada bik alğa kitte. Däwlät qaramağındağı TAİ, Aselsan şikelle şirkätlär dä, Baykar sıman şäxsi firmalar da bu êşkä öleş kertä. Alar yasağan Anka, TB2 şikelle qorallı keşesez oçu apparatları platformaları häm cihazları bik küp front häm bäreleşlärdä näticäle räweştä qullanıla başladı. Törkiyä alardan, bigräk tä, il êçendä häm tışında terrorçı oyışma PKKğa qarşı köräştä faydalana. Alar oyışmanıñ mobilizaśiyä mömkinleklären çikli häm yuğarı däräcäle atamannarın êläkterüdä yärdäm itä. PKK terrorçı oyışması Törkiyägä qarşı qırın ğamällär qılu säläten ähämiyätle külämdä yuğalttı.

Şulay uq, Törkiyäneñ dronnarı Süriyä, Liviyä häm Qarabaxta ğadäti häm yarımkonvenśion köçlärgä qarşı bik täêsirle räweştä qullanıldı. Doşman êlementlarnıñ alarğa qarşı reakśiyä kürsätä almawı, xätta Rusiyädä yasalğan hawadan saqlanu sistemalarınıñ da täêsirsez qaluı kürende. Barı tik soñğı Qarabax suğışında “TB2”lärneñ aktiv role belän yözlärçä Ärmänstan tankı häm bronetexnikası, Panśir’ häm başqa hawa saqlanu sistemaları, meñnärçä cäyäwle êlement täêsirsez xälgä kiterelde. Ärmänstan armiyäse awır yuğaltular belän ciñelüen qabul itte häm Qarabaxtan çıqtı.

Xäzer alğa kitkän modern armiyälär Törkiyäneñ bu yaña suğış doktrinasın häm dronnar belän uñışqa ireşüen öyränergä, üzlärendä dä qullanırğa tırışa.

Törkiyä isä ber adım alda. Ul ANKA belän TB2 şikelle qorallı oçu apparatlarınıñ tağın da östen model’läre bulğan AKINCI häm AKSUNGURnı çığara başladı.

Törkiyä dron texnologiyäläre belän regionda üsüçe quät bularaq tasvirlana. Ul Süriyä – Liviyä – Qarabax şikelle suğış alannarındağı sśenariylarnı üzgärtä.  Moña barı tik  superköçlär sälätle.

Can Acun

SETA agentlığınıñ tışqı säyäsät tikşerenüçe 



Bäyläneşle xäbärlär