Törki däwlätlärneñ hawa aşa êlemtäse üsä

Awraziya qaytawazı - 66/2021

1612586
Törki däwlätlärneñ hawa aşa êlemtäse üsä

2021nçe yılnıñ 21 martında Qazaqstan cömhüriyäteneñ Törkestan şähärendäge Xalıqara Xäzrät Soltan aêroportınnan FlyArystan hawa yulları İstanbulğa berençe säfären yasadı. Bu älege noqtadan çit ilgä oyıştırılğan täwge reys ide. Xäzer FlyAristan Törkestannan İstanbulğa atnada 2 tapqır oça. Anıñ 7 reysqa çığarıluı kötelä.

2020nçe yılnıñ 1nçe dekabrendä açılğan Xalıqara Xäzrät Soltan aêroportı Qazaqstannıñ bäysezlek alğannan soñ nigezdän tözegän berençe hawa portı. Anı Xalıqara Aktau aêroportın êşlätüçe YDA Grour tözi.

2021nçe yılnıñ 25nçe martında Qırğızstannıñ Xalıqara Manas aêroportı “Êti Bakır Tereksay” şirkäte belän Cälälabad töbägeneñ Toguz Toroo rayonında urnaşqan Kärbän aêroportın kiñäytü häm tözekländerü turında söyläşte.  Älege aêroportqa investiśiyä yasap anıñ statusın xalıqara däräcägä citkerü maqsat itep quyıla. 1979nçı yılda tözelgän ob’yektnı Qırğızstan xökümäte 2019nçı yılda tözekländerä, ämma xäzergä qadär annan oçışlar yasalmıy. Äytergä kiräk, “Êti Bakır Tereksay” şirkäteneñ 75%ı akśiyäläre törek “Êti bakır” firmasınıqı. Ul Qırğızstanda Terek, Terekkan häm Pereval’noyı şaxtaları belän idarä itä.

Şul uq könne Üzbäkstan cömhüriyäte Färgana mêriyäseneñ matbuğat xezmäte  Törek hawa yullarınıñ Törkiyädän Färgana şähärenä turı oçışlar başlayaçağın belderde. Aviaşirkätneñ Üzbäkstan filialı mödire Sälim Kahraman citäkçelegendäge delegaśiyä aêroportnı qaraw öçen qalağa kilä. Anda aêroport xezmätlären oyıştıru xaqında da söyläşälär. Bu yañalıq Törkiyädän Üzbäkstannıñ 7 şähärenä oçqıç belän barırğa mömkinlek biräçäk.

Törkiyä şirkätläreneñ Urta Aziyä illäreneñ aviaśiyä mäydanına investiśiyäläre küp yıllar êlek başlanğan ide. TAV aêroportlar xoldingı uzğan yıl Xalıqara Alma-Ata aêroportınıñ idarä itü liśenziyäsen aldı. “Kiklop” töşeleş şirkäte Üzbäkstannıñ Sämärkand aêroportın tözekländerde. Tağın ber törek firması “Alarko Xolding” Törkmänstanda - Aşxabad, Üzbäkstanda – Sämärkand, Boxara häm Ürgänç, Qazaqstannıñ Nur-Soltan aêroportların tözede. Mart ayındağı waqıyğalarnı da kertep, törek şirkätläreneñ Urta Aziya cömhüriyätläreneñ aviaśiyä tarmağına investiśiyäläre totrıqlı räweştä arta.  

Törek hawa yulları Üzbäkstanda – 7, Törkmänstan häm Qazaqstanda – 2, Qırğızstan häm Tacikstanda berär şähärgä säfär oyıştıra. Monnan tış, Pegasus hawa yullarınıñ Qırğızstan häm Qazaqstanğa reysları bar. Şul uq räweşle Urta Aziyä illäreneñ dä härberseneñ hawa yulı şirkätläre Törkiyäneñ İstanbul häm Antaliya şähärlärenä oça.

Aviaśiyä mäydanındağı bu xezmättäşlekneñ kiläse yıllarda yaña yünäleşlär alıp bergäläp boralaq, oçqıç häm dron yasawğa kiterä aluın äytergä mömkin. Çönki törki cömhüriyätlärdä monıñ öçen potenśial citärlek.  

Avtor: Abdrasul İsakov

 



Bäyläneşle xäbärlär