14nçe İqtisadi xezmättäşlek oyışması oçraşuı

Awraziya qaytawazı 63

1598855
14nçe İqtisadi xezmättäşlek oyışması oçraşuı

4 mart könne Törkiyä ilbaşı Räcäp Tayyip Ärdoğan räislegendä 14nçe İqtisadi xezmättäşlek oyışması oçraşuı onlayn uzdı. Oçraşuda Äfğanstan, Azärbaycan, İran, Qazaqstan, Qırğıstan, Tön’yaq Kipr Törek Cömhüriyäte, Üzbäkstan, Tacikstan häm Törekmänstan däwlät başlıqları, Paqıstan prem’yer-ministrı qatnaştı. Ayıruça Xalıqara Törki Şura, Xalıqara Ênergetika şartı kileşüe häm İqtisadi xezmättäşlek oyışması ğomüm särqätipläre bar ide.

Oçraşunıñ teması “Kovid-19dan soñ regional’ iqtisadi xezmättäşlek” bularaq bilgelände. Cıyılışta liderlar tarafınnan pandemiya zararlarınıñ minimal’läşterelüe bäxäsläşelde. Üzbäkstan däwlät başlığı Şäwkät Mirziyoyev pandemiya arqasında qullanılğan çikläwlärneñ êtaplı bularaq beterelüen täqdim itte. Turizm belän bergä törle ölkälärdäge çikläwlärneñ beterelüe barlıq illärneñ iqtisadi yaqtan canlanuına öleş kertäçäk. Bıyıl Duşanbe şähäre İqtisadi xezmättäşlek oyışmasınıñ Turizm başqalası bularaq iğlan itelgän ide. Bu qısada yıl buyı Tacikstanda ber törkem çaralar oyıştırılaçaq.

Oçraşuda liderlar azıq-tölek iminlege mäs’äläsenä dä iğtibarnı cälep itte. Qazaqstan bu mäs’älädä logistik üzäk bulırğa äzer buluın açıqladı. Oyışmanıñ azıq-tölek iminlege mäs’äläsendä İslam xezmättäşlek oyışması belän xezmättäşlegeneñ faydalı bulaçağı citkerelde. Cıyılışta şulay uq bıyıl Üzbäkstanda oyışmağa äğza illärneñ igençelek ministrları cıyılışınıñ uzaçağı belderelde.

Qazaqstan ilbaşı Kasım Coomart Tokayev sälamätlek saqlaw ölkäsendä törek şirkätläre kertkän investiŝiyalärneñ ähämiyäten assızıqladı. Törek şirkätläre sälamätlek saqlaw ölkäsendä İqtisadi xezmättäşlek oyışması illäreneñ barısında da diyärlek êşçänlek başqara. Azärbaycan däwlät başlığı İlham Aliyevnıñ Kovid-19 vakŝinasınıñ dön’yada ğadel räweştä taraluın Berläşkän Millätlär Oyışması  Şurasına citkerü täqdime xuplandı.

Oçraşuda imzalanğan qarar belän Baqıda oyışmanıñ tikşerenü üzäge qorıldı. Tikşerenü üzägen qoru fikere märxüm Xäydär Aliyevnıqı ide. Älege üzäkneñ faydalı êşlär başqaraçağına şöbhä yuq.

Törkiyä oyışmanıñ çirattağı räise wazıyfasın Paqıstannan üz östenä alğan ide. Yıl yarımlıq uñışlı wazıyfadan soñ Törkiyä 14nçe oçraşuda çirattağı räis wazıyfasın Törekmänstanğa tapşırdı. Törekmänstan däwlät başlığı Gurbanguli Berdimuxammedov oyışmanıñ monnan soñğı oçraşuın 28 noyabr’dä Aşxabadta ütkärergä täqdim itte.

1985 yılda Törkiyä, İran häm Paqıstan tarafınnan qorılğan İqtisadi xezmättäşlek oyışması 1992dä 6 ilneñ quşıluı belän zur oyışmağa äylände. Fäqat oyışma xäzergä qadär potenŝialın tulısınça çağıldıra almadı. İlbaşı Ärdoğan beldergänçä oyışmanıñ tağın da aktiv buluı öçen Säwdä kileşüeneñ ğamälgä kerüe, oyışma fondınıñ nığıtıluı zarur.

Xalıqara säwdä häm transport ölkäse oyışmağa äğza däwlätlärne köçäytüçe möhim ölkälär bularaq qabul itelä alına. Bu ölkädäge potenŝial tulısınça qullanılğan oçraqta könçığış belän könbatış arasında äğza däwlätlär altın küper wazıyfasın başqaraçaq häm iqtisadi yaqtan nığıyaçaqlar. Bu bäyläneştä Urta koridor häm aña bäyle transport koridorlarınıñ tulısınça qullanıluı bik möhim. Oyışmağa äğza däwlätlärneñ Tön’yaq Kipr Törek Cömhüriyäten tanu waqıtları da citte.



Bäyläneşle xäbärlär