4nçe Isık (êsse) kül forumı

Awraziya qaytawazı 52

1551161
4nçe Isık (êsse) kül forumı

Dönyaküläm tanılğan yazuçı Çınğız Äytmätovnıñ 12nçe dekabr’däge tuğan köne mönäsäbäte belän Qırğızstan başqalası Bişkäk şähärendä 2020nçe yılnıñ 11nçe dekabr’ könne “Däwlät häm cämğıyät’ êşleklese Çınğız Äytmätov” temalı 4nçe Êsse kül forumınıñ berençe utırışı ütkärelde. Törkiyä Cömhüriyäte mädäniyät häm turizm ministrlığınıñ ximayäsendä oyıştırılğan şuşı forum İlbaşı Räcäp Tayyip Ärdoğannıñ video yullaması belän başladı. İlbaşı Räcäp Tayyip Ärdoğan yullamasında Çınğız Äytmätovnıñ Qırğızstannı, qırğızlarnı häm qırğız mädäniyäten böten dönyağa tanıtuına basım yasadı.

Könçığış belän Könbatış arasında Anadolu mädäniyät proyektları platforması häm Çınğız Äytmätov xalıqara Êsse kül forumı cämğıyäteneñ xezmättäşlege belän oyıştırılğan forumnıñ açılışında Qırğızstan tışqı êşlär ministrı, Törkiyä häm Qırğızstan mädäniyät ministrı urınbasarları, Mäğarif waqıfı başlığı, ilçelär, xalıq ışanıçlıları, rektorlar, cirle xakimiyät başlıqları, Äytmätovnıñ ğailäse, ädäbiyatçelär,  belem, sänğät, säyäsät häm media wäkilläre qatnaştı. Forumda süz aluçılar tanılğan yazuçını törle yaqları belän añlattı.

Berençe utırışnıñ axırında Êsse kül forumınıñ isemeneñ "Çınğız Äytmätov Xalıqara Êsse kül forumı” bularaq üzgärtelüe turında qarar qabul itelde. Forumnıñ 2nçe häm 3nçe utırışları 2021nçe yılnıñ 9nçı-10nçı iyün’ könnärendä Änkarada uzaçaq.

Bişkäk qalasında ütkärelgän forumda Çınğız Äytmätov äsärläreneñ iñ küp Törkiyädä näşer itelüe häm uqıluı belderelde. Êlegräk bu ölkädä Germaniya berençe urında ide. Çınğız Äytmätovnıñ äsärlären Törkiyädä 20dän kübräk näşriyät bastırğan. Törkiyädä Çınğız Äytmätovqa häm äsärlärenä bağışlanıp äzerlängän kandidatlıq dissertaśiyäläre 40tan kübräk. Kastamonu universitetı qarşında yazuçınıñ isemen yörtüçe tikşerenü üzäge dä êşçänlegen alıp bara. Änkara häm Yozgat şähärlärendä yazuçınıñ byustı, İstanbulda häykäle salınğan.

Törkiyäneñ cide şähärendä (Änkarada, Antaliyada, Älazığda, İskeşähärdä, İstanbulda, Kaysäridä, Kocaälidä) anıñ isemendäge parklar bar. Törki dönyanıñ urtaq qıymmäte bulğan Çınğız Äytmätovnıñ isemen Törkiyä Cömhüriyäteneñ saqlawı bik möhim. 2021nçe yılda Änkarada oyıştırılaçaq Êsse kül forumınıñ iñ yuğarı däräcädä uzaçağın äytergä bula.

Çınğız Äytmätovnıñ keşelekneñ urtaq qıymmäte buluı här uzğan yıl yañadan isbatlana. 2020nçe yılnıñ 8nçe-10nçı dekabr’ könnärendä Mäskäwdä häm Bişkäk şähärlärendä “Çınğız Äytmätov häm 21nçe ğasır yäş’läre” isemle kiñ qırlı başqa ber forum oyıştırıldı. 12nçe dekabr’ könne dä Çınğız Äytmätovnıñ tuğan köne Qırğızstanda häm dönyanıñ distälägän ilendä törle çaralar belän qotlandı. Törkiyäneñ törle şähärlärendä iskä alu programmaları oyıştırıldı. Äytmätovnıñ tuğan köne bulğan 12nçe dekabr’ köne Qırğızstanda Ädäbiyat köne bularaq ta qotlana.

1986nçı yılnıñ üktäbr’ ayında oyıştırılğan 1nçe Êsse kül forumı qotıplaşqan Könçığış belän Könbatışnı ber-bersenä yaqınayta. Monnan soñ ütkäreläçäk Êsse kül forumnarı da keşelekneñ töp mäs’älälärenä qağılışlı qaraşlar irekle räweştä telgä alınğan, çişeleşlär täq’dim itelgän platforma bulıp torırğa däwam itäçäk.

Abdrasul İsakov



Bäyläneşle xäbärlär