Süriyädä PKK yanawı äle betmäde

Könüzäk mäs'älälär - 47/2020

1530865
Süriyädä PKK yanawı äle betmäde

Süriyädäge xaostan faydalanıp qabat üzen kürsätä başlağan PKK terrorçı oyışması Äsäd rejimı belän kileşep uydırma räweştä Afrin, Kobani häm Cäzirä kantonnarın iğ’lan itte. Şunnan soñ, DEAŞqa qarşı köräşne qullanıp, AQŞ belän xärbi xezmättäşlekkä kerde häm, kantonnarnı berläşterep, Törkiyäneñ kön’yaq çigen tulısınça kisäçäk räweştä terrorçı däwläte tözergä tırıştı. Törkiyä isä bu yanawnı kürep aldı häm aña çik quyaçaq adımnar yasadı. Berençe çiratta, “Färat qalqanı”, annarı “Zäytün botağı” häm, nihayät’, “Solıx çişmäse” xäräkätläre belän yanawnıñ däräcäsen kimetä aldı.  Ämma töbäktä PKK äle haman bar.  

Terrorçı oyışma PKK Süriyädäge däwamçısı bulğan PYD häm YPG, ğaräplär dä kergän öske oyışma Süriyä demokratik köçläre belän bäyle räweştä Ayn äl Arap, Xasäkiyä, kön’yaqta Rakka häm Deyr äz-Zorda, könbatışta Mänbiç häm Tel Rıfatta xakimlek itä. Biredä idarä strukturası oyıştırıp, AQŞnıñ ximayäsendä, Süriyäneñ neft’ häm tabiğıy gaz çığanaqlarınıñ ähämiyätle öleşen kontrol’ itä.  Oyışma ber ük waqıtta töbäktä kiñ awıl xucalığı cirläre häm ildäge bolay da az su resurslarınıñ kübesen üz qulında tota. Törkiyä soñğı xäräkäte “Solıx çişmäse” belän Tel Abyad häm Räsulayn töbäklären qotqarırğa tırışsa da, terrorçı oyışması äle xaman yaqınça 40 meñ kvadrat kilometr mäydannı yawlağan xäldä.

“Solıx çişmäse” xäräkätennän soñ Törkiyä başta AQŞ belän, annarı Rusiyä belän töbäkkä bäyle kileşülär tormışqa aşırdı. Bigräk tä, Soçida Rusiyä belän Färatnıñ könçığışına qağılışlı häm üz êçenä yöklämälärne dä aluçı ähämiyätle kileşü tözelde. Anıñ buyınça, terrorçı oyışması Aynel Arapta Malikiyä-Fişxabur çigenä qadär bulğan töbäktän kön’yaqqa taba 32 çaqrımğa çigenergä tiyeş ide. Ämma çınbarlıqta bu tormışqa aşmadı. Ul ğına da tügel, terrorçılar Tel Rıfat, Ayn İssa häm Tel Tamir şikelle töbäklärdän Törkiyäneñ kontrolendäge cirleklärgä daimi räweştä höcümnär yasıy. Kübräk bomba quyılğan texnika yärdämendä tormışqa aşırıluçı bu höcümnärdä yözlärçä grajdanlınıñ ğomere özelde. Oyışmanıñ maqsatı - qotqarılğan töbäklärneñ totrıqlılığın bozu.

Terrorçı oyışmanıñ Süriyädä êşçänlek alıp baruı Törkiyä öçen yanaw tudıra. Ägär ul çik buyınnan 32 çaqrım kön’yaqqa taba çigenmäsä, yaña xärbi xäräkätlär tormışqa aşırıluı da bik mömkin.  

Avtor: Can Acun

SETA agentlığınıñ tışqı säyäsät tikşerenüçese 



Bäyläneşle xäbärlär