Qırğızstandağı säyäsi waqıyğalar

Awraziya qaytawazı 43

1513501
Qırğızstandağı säyäsi waqıyğalar

4 oktäbr’ könne Qırğızstanda ğomüm saylawlar uzdı. Qırğız Cömhüriyäte Üzäk Saqlaw Şurası beldergänçä saylawlarda qatnaşqan 16 partiya arasınnan 4 partiya citärle däräcädä tawış cıya aldı. Saylaw näticälärenä rizasızlıq belderüçelär saylaw näticäläreneñ ğamäldän çığarıluı öçen 5 oktäbr’dä Ala Too mäydanında miting oyıştırdı. Protestçılar 6 oktäbr’ könne irtänge sägät’ 03.00tä Parlament binasına kerde. Tönge sägät’lärdä tarafdarları tarafınnan Almazbek Atambayev, Sapar İsakov, Sadır Caparov kebek totqın säyäsätçelär törmädän çığarıldı. İminlek köçläre häm protestçılar arasında barlıqqa kilgän bäreleşlärdä yözlärçä keşe yaralandı, 19 yäş’lek ber yeget wafat buldı.

6 oktäbr’dä Qırğız Cömhüriyäte prem’yer-ministrı, Parlament başlığı, cirle citäkçelektäge gubernatorlar häm mêrlar wazıyfadan kitü öçen ğariza yazdı. Üzäk Saylaw Şurası ğomüm saylaw näticälären ğamäldän çığardı. Oppoziŝiyadäge partiyalär arasında waqıtlıça citäkçelek öçen köräş başlandı. 9 oktäbr’ könne Ala Too mäydanında üz namzäten prem’yer-ministr yasarğa telägän ike törkem arasında ğawğa çıqtı. Sadır Caparovnıñ tarafdarları Ömürbek Babanovnıñ xuplawçıların mäydandan cibärde. Wazğıyät’ tağın da naçaraymasın dip däwlät başlığı Sooronbay Ceenbekov 10 oktäbr’dä Bişkäk şähärendä ğadättän tış xäl iğlan itte. Şul uq könne Almazbek Atambayev ike tän saqçısı belän bergä qabat qulğa alındı.

Qırğız parlamentı Jogorku Keneşneñ 6nçı çor xalıq ışanıçlıları 3 tapqır cıyılıp, 13 oktäbr’ könne Sadır Caparovnı prem’yer-ministr itep sayladı. Parlament başlığı wazıyfasına Kanat İsayev bilgelände. Caparov tarafdarlarınıñ miting oyıştırunı däwam itüennän soñ 15 oktäbr’dä däwlät başlığı Ceenbekov wazıyfasınnan kitte. Parlament başlığı İsayev ilbaşı wäkile buludan üz rizalığı belän baş tarttı. Däwlät başlığı wazıyfasın waqıtlıça Caparov üz östenä aldı.

Qırğızstandağı soñğı waqıyğalarnı bar dön’ya küzätep bardı. Rusiyä ilbaşı Putin üz maxsus wäkilen Bişkäkkä cibärde. Urta Aziya Cömhüriyätläre däwlät başlıqları, Törki Şura, Awrupa Berlege, AQŞ Qırğızstan belän bäyle belderge açıqlap, qırğızlarnı Töp qanun qısalarında êş başqarırğa çaqırdı.

Qırğızstanda totrıqlılıq urnaşa başladı. 16 oktäbr’dä Bişkäktäge ğadättän tış xäl beterelde. Waqıtlıça citäkçelek xalıqara partnyerlar belän mönäsäbätlären däwam itterä.

Qırğız citäkçelegeneñ pandemiyağa qarşı citärle çara kürä almawı, pandemiya arqasında ildäge iqtisadnıñ naçarayuı häm saylawda barlıqqa kilgän qanunsızlıq häm citeşsezleklär xalıqta citäkçelekkä qarata qanäğat’sezlek tudırdı. Näticädä ildä citäkçelek üzgärde.

Kiläse 2-3 ayda Qırğızstanda ilbaşı häm ğomüm saylawlar uzaçaq. İke saylawnıñ ber könne ütkäreläçäge dä äytelä. Parlament xäzer Saylaw qanunın üzgärtü östendä êşli. Alda uzaçaq bu saylawlar Qırğızstannıñ monnan soñ qaysı yuldan baraçağın bilgeliyäçäk möhim saylawlar bulaçaq.

Abdrasul İsakov



Bäyläneşle xäbärlär