“Qarabax azat iteläçäk”

Awraziya qaytawazı - 42

1509114
“Qarabax azat iteläçäk”

2020nçe yılnıñ 27nçe sentyabrendä Ärmänstannıñ höcümennän soñ Qarabaxta köçle bäreleşlär başlandı. Azärbaycan ärmän provokaśiyäsenä kiçekmästän qarşılıq birde: qorallı köçlär böten front buyınça höcümgä küçep ärmännärneñ kire qaçuına ireşte. Ütkän 2 atna êçendä Azärbaycan armiyäse qırıq tiräse toraq punktnı yawlaw astınnan qotqardı. Ärmänstannıñ yözlärçä xärbi texnikası yuq itelde, 400läp keşelären yuğalttılar.

Ärmänstannıñ bu yulı üz yaqlawçılarınnan kiräkle yärdämne kürmäwe küzgä taşlandı. Rusiyä däwlät başlığı Vladimir Putin bäreleşlärneñ Ärmänstan cirlärendä barmawın häm Yerivanğa yärdäm kürsäteläçäk wäzğıyät’ yuqlığın belderde. Bilgele bulğança, Ärmänstan – kümäk iminlek kileşüe oyışması äğ’zası. İlgä höcüm itsälär, başqa äğ’za däwlätlär yärdämgä kilergä burıçlı. Ärmän idaräse monnan faydalanu öçen Qarabax tışındağı Azärbaycan toraq punktlarına höcümnär oyıştıra. Tınıç xalıqqa höcümdä fosforlı töten raketaları, xärbi oçqıç bombası, smerç’ raketası häm tanklarğa qarşı qorallar qullandılar. Xäzergä qadär 40 grajdanlı ärmän höcümnärendä hälaq buldı. Ärmänstan tınıç xalıqqa ut açıp xärbi häm keşelek cinayäte êşli. Monnan tış, alar Baqı-Tbilisi-Cäyxan neft’ütkärgeç çeltärenä höcümnär oyıştırıp terrorçılıq ğamäle qıla.

Dön’yadağı ärmän diasporası härwaqıttağıça pıçraq propagandasın alıp bara. Alar Azärbaycannıñ DEAŞ suğışçıların kiterülären söyli. Ämma Azärbaycannıñ DEAŞ suğışçılarına ixtiyacı bulmawı härkemgä mäğ’lüm. Anda watandaşlar üz teläkläre belän frontqa aşığa. Şul uq waqıtta yäş’lärne mäcbüri räweştä armiyägä alırğa mataşuçı Ärmänstannıñ PKK terrorçıların Qarabaxta suğıştıruı turında bik küp mäg’lümat bar.

Azärbaycannıñ ğadel däğ’wasın yaqlawçılar bu yulı tawışların tağın da qatıraq çığardı. Törki şura bäreleşlär başlawğa Azärbaycannıñ cir bötenlegen yaqlawçı belderü yasadı. Şunnan soñ İlham Aliyev oyışmada toruçı däwlätlärneñ başlıqlarına räxmät xatı cibärde. Monnan tış, TÜRKSOY, Törki akademiya, TürkPA häm Törki mädäniyät häm miras waqıfı şikelle xalıqara oyışmalar da Azärbaycannıñ bu xaqlı köräşen yaqladı. Regiondağı däwlätlärdän Äfğanstan, Paqıstan, Vengriya, Bosniya-Gerśegovina häm Ukraina da Azärbaycanğa teläktäşlek belderde.

Törkiyä inde başınnan birle Azärbaycannıñ yanında. İke däwlät arasında saqlanu ölkäsendä tözelgän kileşülär nigezendä Azärbaycan xärbiläre Törkiyädä yaxşı öyränü uzdı. Törkiyä çığarğan saqlanu sänäğate êşlänmälären Azärbaycan küptän satıp ala başladı. Bu wäzğıyät’ Azärbaycan armiyäseneñ Qarabaxtağı ärmän front liniyäsen özüdä ähämiyätle rol’ uynadı.

9nçı oktyabr’dä Rusiyäneñ iniśiativası belän Azärbaycan häm Ärmänstan tışqı êşlär ministrları Mäskäwdä oçraştı häm utnı tuqtatırğa kileşte. Ämma anı tormışqa aşırunıñ awır buluı berençe könne ük kürende. İlbaşı İlham Aliyevnıñ “Diplomatiyägä soñğı ber mömkinlek tanıyq” dip raslağan utnı tuqtatu kileşüe Ärmänstannıñ höcümnärne däwam itüe arqasında buşqa kitte. Monnan soñ Qarabaxnıñ basıp aluçılardan çistartıluı ğına mäs’äläne tamırdan çişä alaçaq.

Avtor: Abdrasul İsakov



Bäyläneşle xäbärlär