“Soñğı çorda Törkiyä belän Azärbaycan mönäsäbätläre”

Awraziya qaytawazı - 38/2020

1491163
“Soñğı çorda Törkiyä belän Azärbaycan mönäsäbätläre”

Sentyabr’ ayı başlarında Törkiyä belän Azärbaycan mönäsäbätlärenä qağılışlı ähämiyätle waqıyğalar ber-ber artlı buldı. Başta alarnı tärtibe belän qarap çığıyq. 2020nçe yılnıñ 2nçe sentyabrendä ilbaşı İlham Aliyev Greśiyäneñ Baqıdağı yaña ilçese Nikolaus Pipegirosnı qabul itü çarasında Könçığış Urta diñgezdäge tikşerenülärne dä kertep här mäs’älädä Törkiyä yaqlı buluların belderde. “Ärmänstan, Greśiy häm Kiprnıñ grek yağı arasındağı xärbi xezmättäşlek bezne borçıy,”-dide ul.

7nçe sentyabr’dä Azärbaycan ilbaşı kiñäşçese häm ilbaşı idaräseneñ tışqı säyäsät dairäse räise Xikmät Xaciyev citäkçelegendäge delegaśiyä Törkiyägä säfär yasadı. Alar ilbaşı êlemtä idaräse räise Fäxretdin Altun citäkçelegendäge törek delegaśiyäse belän söyläşü uzdırdı. Anda mäğ’lümati tarmaqtağı xezmättäşlek xaqında süz bardı. Söyläşülär näticäsendä berdäm Törkiyä-Azärbaycan media platforması tözü mäs’äläsendä kileşü tözelde. Xaciyev citäkçelegendäge delegaśiyä säfär qısalarında Törkiyäneñ êlemtä tarmağında êşçänlek alıp baruçı oyışmaları belän dä söyläşülär ütkärde.  

9nçı sentyabr’dä Azärbaycan milli parlamentı räise urınbasarı Adil Aliyev Törkiyäneñ Urta dingezdäge êşçänlegenä teläktäşlek kürsätep “Törkiyäneñ dusların – dus, doşmannarın- doşman” kürülären belderde. “İlbaşı İlham Aliyevnıñ yaña bilgelängän Greśiyä ilçesenä bu poziśiyäne citkerüe häm Törkiyä tarafında buluıbıznı äytüe barı greklarğa ğına tügel, böten dön’yağa iğ’lanı. Dön’yanıñ törkilärneñ köçen qabat kürü waqıtı citte,”-dide ul.   

11nçe-12nçe sentyabr’ könnärendä Azärbaycan milli parlamentı räise Saxibä Gafarova berençe çit il säfärenä çıqtı -  Törkiyägä. Anıñ citäkçelegendäge delegaśiyä başta Törkiyä Böyek Millät mäclese räise Mostafa Şäntop belän oçraştı. Fiker alışu ikeyaqlı mönäsäbätlär xaqında ide. 12nçe sentyabr’dä Saxibä Gafarovanı ilbaşı Räcäp Tayyip Ärdoğan qabul itte. Azärbaycan delegaśiyäse Törkiyä säwdä ministrı Ruxsar Päkcan belän dä oçraştı. Anda ike il arasında iq’tisadi mönäsäbätlärneñ barışı häm äle söyläşü êtabında bulğan İrekle säwdä kileşüe turında süz bardı.

Soñğı waqıyğalardan kürengänçä, Törkiyä belän Azärbaycan mönäsäbätläre “ike däwlät, ber millät” şiğarenä turı kilüçe räweştä üsä. Alarnıñ avgust ayında urtaq xärbi öyränülär ütkärüe regiondağı qayber illärne poşamanğa qaldırdı häm alarnıñ Törkiyägä qarşı tağın da höcümçel säyäsät alıp bara başlawına säbäpçe buldı. Bu nisbättän, ilbaşı İlham Aliyevnıñ Greśiyä ilçesen qabul itü çarasında Törkiyägä teläktäşlek belderüe bik urınlı ide. Yuğarı däräcäle idaräçelärneñ täwge çit il säfärlären ber-berlärenä yasaw tradiśiyäsen Azärbaycan parlamentı spikerı bularaq saylanğan Saxibä Gafarovanıñ däwam itüe dä  soqlandırğıç adım.

Törkiyä belän Aäzrbaycannıñ media tarmağında berdäm platforma tözü iniśiativası da bik urınlı. Regionnıñ çeterekle çorda buluın isäpkä alsaq, mondıy xezmättäşlek ike yaqnıñ da mänfäğatendä. Bu iniśiativa Törki şura däwlätläre tarafınnan da yaqlansa, monnan böten törki dön’ya otaçaq.

Avtor: Abdrasul İsakov

 



Bäyläneşle xäbärlär