Qarabax kire alınğanğa qadär...

Awraziya qaytawazı - 30

1460016
Qarabax kire alınğanğa qadär...

Bügenge yazmabızda süz Azärbaycan belän Ärmänstan çik buyında bulğan bäreleşlär xaqında baraçaq.

2020nçe yılnıñ 12nçe iyülendä Ärmänstan utnı tuqtatu kileşüen bozıp höcüm yasadı. Şunnan soñ Azärbaycan belän ike arada bäreleş buldı. Tovuz töbägendäge älege bäreleşlärne älegä tuqtatuğa ireşä almadılar. İke il arasında soñğı tapqır 2016nçı yılnıñ aprel’ ayında zur bäreleş bulğan ide.

Xäzergä qadär Azärbaycan ber generalnı da kertep 12 xärbi häm 1 grajdanlınıñ şähit buluın xäbär itte. Ärmänstan 4 ğaskäriyeneñ ülüen citkerde, ämma bu sannarnıñ döreslekkä turı kilmäwe Azärbaycan qorallı köçläreneñ sonğı atışu waqıtında töşerelgän videolarnı urtaqlaşuınnan soñ añlaşıldı. Ärmänstannıñ çik buyı töbäklärendäge bäreleşne Tawlı Qarabax tışına çığarırğa teläwe Yerivan idaräseneñ yaña pıçraq uyınnar başlarğa mataşuın kürsätä.

Şähitlär soñğı yulğa ozatılğannan soñ Azärbaycan xalqı uramnarğa çığıp Qarabaxnı kire alu öçen mitinglar oyıştırdı. Soñğı könnärdä üze teläp armiyägä yazılğan watandaşlarnıñ sanı 25 meñnän artqan. Azärbaycannar Qarabaxnı alu öçen nıqlı qararğa bardı.

Sonğı yıllarda Tawlı Qarabaxnıñ xalıqara terrorçılıq oyasına äwerelüe, Urta Aziyä suğışçılarınıñ anda öyränülär uzuı  turındağı süzlär könüzägendä. Bu farazlarnıñ citdi qabul itelep tikşerelüe möhim. Yuqsa Azärbaycan armiyäse kiläçäktä dön’yanıñ törle cirleklärennän cıyılğan yallanğan üterüçelär belän köräşergä mäcbür bulaçaq.

Çik buyındağı waqıyğalardan soñ ilbaşı İlham Aliyev tışqı êşlär ministrı Êl’mar Mämmäd’yarovnı êşennän azat itte. 2004nçe yıldan birle älege wazıyfada bulğan keşeneñ alınuı Baqı idaräseneñ tışqı säyäsättä, bigräk tä Qarabax mäs’äläseneñ çişeleşendä, tağın da qatğıyraq bulırğa teläwen kürsätä.

Bäreleşlärdän soñ Ärmänstan üze äğ’zası bulğan Kollektiv iminlek kileşüe oyışmasınnan teläktäşlek almadı. Törki şura isä Azärbaycannı yaqlawçı belderüen şunda uq çığardı. İran tışındağı kürşeläre belän ğawğalı Ärmänstan, suğış ixtimalında, däwlät bularaq tağın da awır xäldä qalırğa mömkin.

Tawlı Qarabaxnı basıp alğannan soñ regionda häm dön’yada bik küp närsä üzgärde. Azärbaycan saqlanu tarmağında Ärmänstannan berniçä tapqır östen. Törkiyä dä, köçle bäreleşlär bula qalsa, Äzärbaycanğa kiräkle barlıq yärdämne biräçägen belderde. Anıñ soñğı çorda uzdırğan uñışlı xärbi operaśiyäläre böten dön’yağa mäğ’lüm.

Ärmänstanda Nikol’ Paşin’yannıñ xakimiyätkä kilüennän soñ Rusiyä-Ärmänstan mönäsäbätläreneñ torğınlıqqa kerüe kürenä. Yerivan idaräse, suğiş bula qalsa, tön’yaqtağı yärdämçesennän kötkän teläktäşlekne almasqa mömkin. Şuña kürä basıp aluçı Yerivannıñ provakaśiyä çaralarınnan alda yaxşılap uylawı zarur.

Qarabax mäs’äläsen çişü öçen tözelgän Minsk törkemeneñ üz waqıtın tutıruı bilgele. Monıñ öçen Törkiyä dä êçenä kergän yaña xalıqara mexanizmnıñ buldırıluı möhim. Mäsälän, Astana öçlese bu mäs’älädä üz süzen äytä alır ide. Çönki Qarabax mäs’äläse andağı 3 däwlätkä dä qağılışlı.

Qısqası, xaqlıq üz urının tapqanğa häm Qarabax kire alınğanğa qadär bu köräş däwam itäçäk.  



Bäyläneşle xäbärlär