Üzbäkstan ilbaşınıñ Änkarağa säfäre

Üzbäkstan ilbaşı Şäwkät Mirziyayev Törkiyä - Üzbäkstan yuğarı däräcäle strategik xezmättäşlek şurası cıyılışında qatnaşu öçen ağımdağı yılnıñ 19-20 fevral’ könnärendä Törkiyägä räsmi säfär yasadı. Qunaqnı Änkarada Törkiyä ilbaşı Räcäp Tayyip Ärdoğan tantanalı räweştä qarşı aldı. Annan soñ ilbaşları üzara küreşep söyläşte. Törkiyä –Üzbäkstan yuğarı däräcäle strategik xezmättäşlek şurası cıyılışınnan soñ ike il arasında 4 kileşügä qul quyıldı. Soñğı 2 yılda ike il arasında 48 kileşügä imza salındı.

Törkiyä – Üzbäkstan mönäsäbätläre 2014 nçe yıldan birle äkrenläp kamilläşä bara. Mirziyayev ilbaşı bulıp saylanğannan soñ mönäsäbätlärdä alğarış barlıqqa kilde häm Üzbäkstan ilbaşınıñ soñğı Änkara säfäre belän strategik däräcägä kütärelde. Liderlarnıñ soñğı yıllardağı ike yaqlı säfärläre häm Törki şura, İslam xezmättäşlek oyışması kebek xalıqara oyışmalardağı oçraşuları ike yaqlı mönäsäbätlärneñ üsüenä säbäp buldı.

Törkiyä – Üzbäkstan mönäsäbätläre törle tarmaqlarda könnän kön üsä bara. Ber yıl êlek Üzbäkstan Törkiyä watandaşlarına 30 kön vizasız Üzbäkstanda qala alu mömkinlege tudırdı. İke yaqlı oçqıç säfärläre İstanbuldan barı tik başqala Taşkentqa ğına tügel, Boxara,Sämärkand şähärlärenä dä başlandı. Monıñ nigezendä 2019 nçı yılda ike yaqlı 300 meñ turist Üzbäkstan häm Törkiyäneñ törle şähärlären gizde. Törkiyä turizm tarmağındağı täcribälären Üzbäkstan belän dä urtaqlaşa.

Şäwkät Miriziyayev Änkarada törek êş dönyasınıñ tanılğan wäkilläre belän dä küreşep söyläşte. Oçraşuda Üzbäkstandağı kapital salu mömkinlekläre añlatıldı. İke il arasındağı säwdä küläme 2019 nçı yılda 2 milliard 200 million dollarnı uzıp kitep, Änkaradağı cıyılışta ilbaşlarınıñ yaña 5 milliard dollar maqsatın bilgeläwenä nigez äzerläde. “Ziraat” bankınıñ Üzbakstanda açıluı, andağı törek şirkätläre sanınıñ 1300dän artuı häm Törkiyä investiśiyäläreneñ Üzbäkstanda törle tarmaqlarğa taralğan buluı älege maqsatnıñ qısqa waqıtta tormışqa aşu ixtimalına işarät itä.

Üzbäkstan, Törkiyä häm Paqıstan 2019 nçı yılnıñ aprel’ ayında täwge tapqır urtaq xärbi künegülär ütkärde. İminlek tarmağındağı bu xezmättäşlek Taşkent häm Änkaranıñ monnan soñ tağın da yaqın xezmättäşlek başqaraçağına işaräli.

 Törkiyä häm Üzbäkstan Äfganstanda totrıqlılıq urnaştıru öçen dä urtaq êşçänleklär alıp bara.İke ilneñ saqlanu sänäğätendä başqaraçaq xezmättäşlege häm ike il, häm töbäk iminlegenä küp närsä östäyäçäk.  

 İlbaşı idaräse kitapxanäse açılışınıñ Şäwkät Mirziyayevnıñ Törkiyä säfäre waqıtına turı kilüe bik möhim ide. Üzbäkstan Törkestannıñ üzägendä urnaşqan häm Taşkent berençe çiratta bulu belän bergä Üzbäkstan şähärlärendä Törek-İslam dönyasınıñ iskitkeç xäzinäse Üzbäkstannan çittäge ğalimnärneñ küp yaqlı tikşerenülären kötä. Törkiyä Üzbäkstan belän mäğarif, din häm belem tarmaqlarında xezmättäşlek proyektlarına da kereşte.

Soñğı Baqı sammitında Törki şurada qatnaşuçı Üzbäkstannıñ TÜRKSOY,TÜRKPA kebek xalıqara oyışmalarda da aktiv buluı Törkiyä – Üzbäkstan mönäsäbätlärenä uñay yoğıntı yasayaçaq. Xivä qalasınıñ bıyıl törki dönyanıñ mädäniyat başqalası itep saylanuı da möhim waqıyğa.

Süzebezne yomğaqlap şunı äytäse kilä,Şäwkät Mirziyayevnıñ Törkiyägä säfäre ike yaqlı mönäsäbätlärne kamilläşterü cähätennän näticäle säfär buldı. Törkiyä ilbaşı Räcäp Tayyip Ärdoğan Üzbäkstan ilbaşın ozatqanda ike yaqlı mönäsäbätlärneñ monnan soñ da yuğarı däräcädä däwam itäçägen citkerde.