Zärdä tatlı aşamlığı

Bügen bez ğosmanlı sarayı rizıqlarına qarağan, bügenge köndä siräk tä bulsa yasalırğa däwam itelgän tatlı aşamlıq turında süz alıp barırbız. Döge belän yasalğan häm läzzäten tämlätkeç bularaq qullanılğan zäğ’fran häm kurkumadan alğan täm-tomnıň iseme: “zärdä”.

Ğosmanlı çorında baştaraq matäm aşamlığı bulıp belengän “zärdä” annan soň sönnät, tuy häm ciňü qotlawları kebek maxsus könnärdä deśert bulıp täq’dim itelä häm qotlaw tatlı aşamlığına äylänä. Zärdäneň bu çorlarda bu çaqlı yaratıluınıň säbäbe isä zäğfrannıň qoyaşqa häm altınğa oxşağan matur sarı töse bula. Zäğfrannıň qıybat buluı arqasında bügenge köndä şaqtıy üzqimmätle tatlı aşamlıqqa äylängän zärdäne barı tik kurkuma qullanılıp äzerläw dä mömkin. Ämma bez şulay da original’ reśeptqa tuğrılıqlı qaluığıznı kiňäş itäbez. Öydä, roza suında qaynatılğan zäğfrannıň aromatı belän läzzätländerelgän çın zäğfran täme başqa törle bula.

Xäzer inde zärdä peşerü öçen kiräkle azıq-tölekne sanap uzıyq:

1 stakan döge

2 litr su

1/2 (yartı) kg şikär yäisä 1 yarım stakan bal

2 qaşıq kukuruz kraxmalı

Yarım stakan roza suı

1 gramm zäğfran

yarım bal qaşığı kurkuma.

Bizäw öçen:

30 gramm kipterelgän waq yözem

30 gramm kedr çikläwege

Ä xäzer inde zärdäne peşerä başlıybız. İň êlek zäğfrannı ber tön aldan roza suınıň êçendä yabıq sawıtta kötteräbez. Kipterelgän waq yözemnärne yuıp, çistartığız häm yomşap şeşüe öçen suda kötteregez. Şul arada dögene yuığız häm 2 litr suda yomşanğançığa xätle peşeregez. Kraxmalnı yarım stakan suda êretep, qaynawçı dögeneň êçenä qatıştırıp tügegez. Şikärne yäisä balnı, zäğfranlı roza suın häm kurkumanı da kästrülgä quşığız. Gel qatıştırıp qaynatığız. Qaynıy başlağannan soň utnı azaytığız häm zärdäneň quyılaşuı öçen beraz tağın peşeregez. Peşkän zärdäne uttan alıp, altı qasägä tigez itep quyığız. Suığannan soň zärdäneň östen kipterelgän waq yözem häm kedr çikläwege belän bizäp täq’dim itegez. Tämle bulsın!