“Yılarlıq yäşebez qalmadı”

Tawğa urlanğan balaları öçen XDP partiyäse töbäk bülege binası yanında utırıp rizasızlıq belderüçe Diyarbakır äniläre 2 aydır vaxtaların däwam itä.

“Yılarlıq yäşebez qalmadı”

Älege çaranı Xacirä xanım Akar başlap cibärde. Ul, uğlı Mäxmät tawlarğa urlanğannan soñ, 22nçe avgustta Diyarbakırdağı Xalıq demokratik partiyäseneñ binası qarşında utıru çarası başladı. Balasınıñ yuqqa çığuında ana firqane ğayepläde.

Xacirä Akarnıñ ulın terrorçılarğa qorban itmäw öçen başlağan köräşe näticäle buldı - 24nçe avgustta aña bağalmasın kire qaytardılar. Bu waqıyğa şundıy uq xäldä qalğan başqa ğailälär öçen ürnäk buldı.

Ğailälär sanı 55kä citte.   

Akarnıñ köräşennän ürnäk alıp, Fäwziyä Çätinkaya, Rämziyä Akkoyun häm Ayşägöl Biçär 3nçe sentyabr’dä utıru çarasın başlıy. Alarğa tağın 55 ğailä quşıla.

Partiyäneñ töbäk binası yanında kön buyı balaların kire qaytarırğa teläwçe analarnıñ rizasızlıq çarası häm alarğa teläktäşlek kürsätüçelär özelmi.

Törkiyä êçke êşlär ministrı Söläyman Soylu, ğailä, mäşğul’lek häm sośial’ xezmätlär ministrı Zöhrä Zümrüt Sälçuk, şähit ğailäläre, säyäsätçelär, sänğat’çelär, jurnalistlar, yazuçılar, ictimağıy oyışma wäkilläre - cämğıyät’neñ här kisemennän watandaşlar älege ğailälär yanına barıp alarnıñ borçuların urtaqlaştı, teläktäşlegen belderde.

Qullarında balalarınıñ fotoları belän utıru çarasın däwam itüçe analar, özelep sağınuların yäşermiçä, ulların kürü ömeten sündermiçä kötä.  

“Tormışıbız tuqtap qaldı”

Ömmexan Nilifırka İstanbuldan kilep Diyarbakırdağı analarğa quşıldı. Anıñ ulı Mäxmätne 4 yıl êlek alıp kitkännär.

Ul balasınıñ urlanuında Xalıq demokratik partiyäsen cawaplı itep kürsätä. “XDP urladı ulımnı - beläm. Balamnı miña kire birsennär. Annan ber xäbär dä, telefonnan şaltıratu da bulmadı. Ğailäbez belän üle şikelle bez. Balabıznı urladılar - tormışıbız tuqtap qaldı. Küzebezdä yılap yäşebez qalmadı. Balamnan närsä telilär? Ulım kırmısqanı da räncetmäs ide, yaxşı uqıdı,”-di xäsrätle ana.

Nilifırka 2 ay buyı uramda utıruın häm XDPdan açıqlaw kötüen belderde.  

“Çığıp bezgä berär närsä äytsennär. Alar da körd bulsa, kilep yanıbızda utırsınnar. Miña mondıy kördlek kiräk tügel. Min dä körd. Balam belän säyäsät yasamasınnar. Ulımnıñ bäysezlegen, kiläçägen tartıp aldılar,”-dip özgälänä Ömmexan Nilifırka. Ul axırğa qadär utıraçaqların äytä.

“Balamnı almıyça monnan kitmibez”

5 bala änise Fatma Bingöl dä İstanbuldan. Anıñ ulı Tuncaynı 5 yıl êlek 14 yäşendä waqıtta tawlarğa alıp kitkännär. Ana balasın bik sağınuın häm anı kürergä teläwen belderä.

Fatma xanım 5 yıldır ulınıñ qayda ikänen belmi. “Balalarıbıznı kitersennär. Bu qadär ana monda kötmäsen, analarnı qızğansınnar, gönah bu. Bu qadär ananı yılatırğa, alarnıñ küñelen kitep, ğazap utlarında yandırırğa berkemneñ dä xaqı yuq. Barıbız qulğa qul totınıştıq: balalarıbıznı almıyça kitmäyäçäkbez. Kiräk bulsa ütersennär. Ülemnän qurıqmıybız,”-dip söyli Fatma xanım.

“PKKnıñ kördlärgä niçek zolım itüen kürsennär”

Söngül Altıntaşnıñ ulı Möslimne 2015nçe yılnıñ 2nçe oktyabrendä Tuncälineñ Pülümür rayonında terrorçılar urlağan. Anağa balasınnan 4 yıl xäbär-xäter kilmi.

“60 kön monda torabız, 60 yıl monda toraçaqbız. Balabız kilgängä qadär monda bulaçaqbız,”-di Söngül xanım. Ul balaları tawğa urlanğan ana häm atalarnı utıru çarasında qatnaşırğa çaqırdı.

“Körd analar uyansın - balaların küz allarınnan alıp kitälär. Uyansınnar da PKKnıñ kördlärgä niçek zolım itüen kürsennär. Ananı da, atanı da, balanı da qızğanmıylar. Monı nixayät’ kürsennär. Bezneñ berdänber doşmanıbız - PKK,”-di Söngül Altıntaş.

“Qızım kilmiçä monnan kitmibez”  

Ağrıdan 4 yıl êlek 17 yäşendä tawğa qaçırılğan qızı Çiğdäm öçen çarada qatnaşuçı ata Yasin Kaya da êçendäge xäsräten buşattı.

Ul rizasızlıq kürsätüçe ata-analarnıñ qardan, qıştan qurıqmıyça balaların kötülären däwam itäçäklären belderde.

“Ber belderü kötäbez. Qızım kilmiçä monnan kitmibez. Alar körd buluların söyli, körd tügel alar. Çın kördlär - bez. Balamnı tawğa XDP urladı. Räxim itep monda kilsennär dä: “PKKnı qahär suqsın, bez PKKğa quşılmıybız” disennär. Bez şul waqıtta qaytıp kitärbez. Bez alarnın cawaplı buluın uylıybız,”-di Yasin Kaya.



Bäyläneşle xäbärlär