Tuy aşı

Törek aş-suları - 40

Tuy aşı

Bügen süzebez aşlar turında. Ğosmanlı imperatorlığında älege rizıqnıñ urını ayırım bulğan. Saray aş öyendä dä, gadi xalıqnıqında da köngä kimendä ber tapqır aş peşkän. Anı xäzerläw öçen törledän-törle azıq-tölek qullanğannar.  Badäm, bakla, kaştan, täränce, örek - şularnıñ qayberläre genä. Alar belän peşerelgän aşlarnıñ kübese xäzerge waqıtta törek aş-suları isemlegennän töşep qalğan. Ämma Ğosmanlı çorındağı ber aş äle bügen dä tabın türendä. Anıñ iseme - “düğün çorbası”. Bezneñçä -  tuy aşı. Anı, ğadättä, tuy, nikyax şikelle tantanalı mäcleslärdä xäzerlägännär. İseme dä şunnan kilä.  

Xäzer tuy aşı peşerü öçen kiräk bulğan azıq-tölekne barlap çığabız.

500 gramm bärän ite

itne peşerü öçen 6 stakan su

3 aş qaşığı atlanmay

2 aş qaşığı çümäkäy on

toz, borıç

3 stakan it şulpası

3 stakan su

4 aş qaşığı yoğırt

yartı limonnıñ suı

1 yomırqa sarısı

1aş qaşığı atlanmay

qızıl borıç

Çirat aşnı xäzerläwgä citte. Başta itne 6 stakan su belän peşerergä quyabız. Su qaynap çıqqaç, utnı qısabız häm qapqaçın qaplap urtaça utta peşeräbez. İt yomşarıp peşkäç, şulpanı sözep ber sawıtqa alıp quyabız. İtne suıtabız häm söyäklärdän çistartıp, keçkenä kisäklärgä kisäbez.

Atlanmay belän onnı ber kästrül’dä ciñelçä qızdırabız. Östenä 3 stakan şulpa häm 3 stakan sunı äkren genä östäp bolğatabız. Waqlanğan itlärne salabız.  

Ayırım ber sawıtta yoğırt, yomırqa sarısı häm limon suın bolğatabız. Aştan ber baqraç şulpa alıp şuña quşabız häm bolğatıp äkren genä aşqa salabız. Tozın da östäp qaynatıp çığarabız häm sünderep quyabız.

Tabada 1 aş qaşığı atlanmay êretep, aña qızıl borıç sibäbez. Älege maynı aş östenä salıp tabınğa çığarabız. Tämle bulsın!



Bäyläneşle xäbärlär