Tas käbabı

Tas käbabınıñ tarixı bik borınğığa barıp totaşa. Ul Ğosmanlı aş-sularınıñ berse. Tas süze törekçädän taz, tabaq dip tärcemä itelä. Êlek bu rizıqnı baqır tabaqlarda peşergännär, şınnan iseme dä tas käbabı bulğan dip söylilär. Anı äle dä borınğıça äzerläwçe restorannar bar. Ämma öydä, ğadättä, kalın töple kästrüldä peşerälär. Tas käbabı tabınğa üze genä dä çığarıla ala, şulay uq, bäräñge bolamığı yäisä döge botqası belän tämle bula.  Ä xäzer rizığıbıznı äzerläwgä küçik.

Başta tas käbabı peşerü öçen kiräkle azıq-tölekne sanap çığıyk.

yartı kilo waq itep turalğan bärän ite

1 aş qaşığı sıyıq may

2 aş qaşığı atlanmay

1 baş waq itep turalğan suğan

1 danä êre itep turalğan kişer

3 danä êre itep turalğan bäräñge

4 teş sarımsaq

2 bal qalağı tomat pastası

3 stakan cılı su

yarım bal qalağı toz

qara borıç

Tas käbabı peşerü öçen başta sıyıq maynı kästrüldä qızdırabız, soñınnan atlanmaynı da quşabız häm itlärne kästrülgä salabız. Urtaça utta itlärneñ suı çığıp parğa äylängänçe peşeräbez. Şunnan soñ keçkenä itep turalğan suğannı salıp itlärne qızdırunı däwam itäbez. Berniçä minuttan sarımsaqlarnı da kästrülgä salabız. Suğan häm sarımsaq yomşarğaç, tomat pastası salıp bolğatabız. Annarı kästrülgä cılı su salabız häm êre itep turalğan bäräñge belän kişerne quşabız. Toz häm qara borıç sibäbez. Kästrülneñ qapqaçın qaplap qısıq utta itlär yomşarğanğa qadär kimendä 30 minut peşeräbez.  

Aşlarığız tämle bulsın!