Ksantos häm Letoon antik şähärläre

Ksantos häm Letoon - tarixları bezneñ êrağa qadär  3000 nçe yıllarğa barıp totaşqan ike antik şähär. Törkiyäneñ Urta dingez töbägendä Antaliya häm Mugla çikläre êçendä urnaşqan bu şähärlär YUNESKOnıñ Bötendönya mirası isemlegendä urın ala.

Ksantos borınğı zamanda Likiyanıñ iñ zur administrativ üzäge häm başqalası bula. Bezneñ êrağa qadär  545 nçe yılda farsılar xakimiyätenä kergänçe bäysez bulğan qala monnan yaqınça 100 êlek tulısınça yanıp betä. Yanğınnan soñ qabat tözelä. Xätta bezneñ êrağa qadär 2 nçe ğasırda Likiya Berlegeneñ başqalası itep iğ’lan itelä.

Soñraq rimlılar häm vizantiyälelär kontrolenä kergän Ksantos 7 nçe ğasırdağı ğaräp ağımnarına qadär Vizantiya xakimiyätendä qala. Şähärdä yäşägän här śivilizaśiya qorılmalarında Likiya tradiśiyälären,êllinistik häm Rim däwere yoğıntıların kürergä mömkin.Divarlar belän äyländerep  alınğan şähärneñ iñ iğ’tibarnı cälep itüçe tabıldıqları – êllinistik däwergä qarawçı teatr, memorial’ qaberlär, Likiya läxetlärendäge bizäklär häm yazmalar.

Ksantosqa 4 çaqrım yıraqlıqta urnaşqan Letoon qalası isä antik däwerdä Likiyanıñ dini üzäge bula.

30 yıl buyı alıp barılğan qazu êşlärendä tabılğan tabıldıqlarğa kürä biredäge täwge cirläşü bezneñ êrağa qadär 7 nçe ğasırğa barıp totaşa. Borınğı şähär üzägendä 3 ğıybadätxanä bar. Alar Artemis, Apollon häm Letoğa bağışlanğan. Töbäktäge 3 telle yazma Likiya telen añlawda zur rol’ uynıy. Ğıybadätxanälär yanında 1 çişmä häm çirkäw urnaşqan. Êllenistik däwere teatrı möhim tabıldıq bulıp tora.

Ksantos belän Letoon arxeologik tabıldıqlar häm Likiya śivilizaśiyäseneñ original’lege cähätennän dönya mirasınıñ möhim qıymmätläre.

Bu antik şähärlärne kürü öçen bu töbäkkä barasız ikän karetta karetta diñgez taşbaqalarınıñ Törkiyädäge iñ möhim ürçü urınnarınnan berse bulğan Patara plyajında qızınırğa häm diñgezdä qoyınırğa, Kekova qultığında işkäkle köymädä yörergä, Dämrädage İzge Nikolay çirkäwen barıp kürergä , iskitkeç qultıqlarda köymä turlarına çığarğa kiñäş itäbez.