Troya antik qalası

Törkiyädä turizm 10

1153717
Troya antik qalası

Troya – dönyadağı  iñ tanılğan antik qalalarnıñ  berse.

Troya xaqında dastannar yazılğan, ul ğıyşıq,qaharmanlıq häm śivilizaśiya yortı bularaq belenä. Çanakkalä buğazı yar buyına 4 çaqrım 500 metr yıraqlıqta ,Qaz tawı itäklärendä urnaşqan antik şähärneñ tarixı bezneñ êrağa qadär 3000 nçe yılğa barıp totaşa.

Gomernıñ “İliada” dastanında süz alıp barılğan Troya suğışı uzğan cirlär biregä kilüçelärne meñnärçä yıllıq ütkännärgä alıp kerep kitä.

İtäklärendä Troya şähäre qorılğan Qaz tawı mifologiyaga kürä dönyada täwge güzällek bäygese ütkärelgän urın da. Güzällek bäygesendä qatnaşuçı çibärkäylär Gera, Afrodita, Afina bula. Saylap alu wazıyfasın üz östenä alğan Paris üzenä Sparta patşasınıñ xäläl cefete Yelenanı wäğ’dä itüçe Afroditanı saylıy.Parisnıñ Yelenanı urlawı belän suğış başlana. Ğaşıyqlar Troyağa kilä häm şul räweşle axeyślar belän Troya xalqı arasında yaqınça 10 yıl däwam itäçäk suğış başlana.

Bezneñ êrağa qadär 1180 nçe yıllarğa turı kilgän Troya suğışında ike yaq ta östenlekkä ireşä almağaç axeyślar troyalılarğa bik xäyläkär, mäkerle tozaq qora.Suğıştan çigengän kebek kürenep , tınıçlıq simvolı bularaq Troyağa ağaç at cibärälär. Ağaç atnıñ êçendä komandirlar häm ğaskärlär bula. Suğışta arıp-alcığan häm söyenep tınıçlıq urnaşunı bäyräm itüçe Troya xalqı tönlä isertkeç êçemleklär dä êçep yoqlap yatqanda ağaç at êçennän çıqqan ğaskärlär üz êşen başqara. Troya yandırıla, qurqınıç küpläp üterüdän soñ şähär xäräbägä äwerelä.

 

Troya suğışlar häm tabiği afätlär arqasında berniçä tapqır qabat tözelä. Cirläşü öçen uñaylı geografik torışı tarix däwamında şähär tormışı mäydanı bularaq köndäşlek tudıra. 14 nçe ğasır azaqlarına taba iq’tisadi häm mädäni ähämiyäten yuğalta.

Troyanıñ iñ möhim üzençälege – 9 törle şähär qatlamına iyä buluı. Bu 9 qatlam özleksez bularaq 3000 yıldan kübräk waqıtnı kürsätä häm töbäktä yäşägän śivilizaśiyälärneñ êzlären çağıldıra.  

Troya tarixi qalasında berençe qazu êşläre 1871 nçe yılda ütkärelä. Annan soñğı yıllarda däwam itkän qazu êşlärendä teatr, munçalar häm başqa tabıldıqlar belän bergä şaqtıy kamil kanalizaśiya sisteması häm qorılmalar nigezläre tabıla. Bik bay häm butalçıq arxeologik strukturanı cir östenä çığaru êşçänlekläre bügenge köndä da däwam itä.

Keşelek tarixındağı iñ möhim cirläşü üzäge bulğan Troya 1998 nçe yılda YUNESKOnıñ Bötendönya mirası isemlegenä kertelä.

Ägär Çanakkalegä yulığız töşä ikän dönya tarixındağı möhim suğışlarnıñ berse bulğan Çanakkalä suğışınnan soñ buldırılğan Şähitlär ziratın kürergä, Assosta Afina ğıybadätxanäsen qararğa ,tabiği maturlıqqa ğaşıyq ikänsez Qaz tawların barıp kürergä kiñäş itäbez. Gökçeada häm Bozcaada da mädäni häm tabiği maturlıqları belän iğ’tibarnı cälep itüçe turistik urınnar.

 

 

 

 

 

 

 

 

 

 

 

 

 

 

 

 



Bäyläneşle xäbärlär