Terrorğa qarşı köräştä qatğıylıq

Törkiyä 15 nçe iyül’däge tüntäreleş kereşüennän soñ iğ’lan itkän yaña terrorğa qarşı köräş doktrinası qısasında terrorğa qarşı köräşne üz çikläre belän genä çiklämäyäçäk häm terrornı urınında, çığanağında yuqqa çığaraçaq. Älege doktrina qısasında Törkiyä “Färat qalqanı” xäräkäte belän çik buyın “DEAŞ” terror oyışmasınnan çistartqannan soñ “Zäytün botağı” xäräkäte belän Afrin töbägen terrorçılardan arındıruğa ireşte. Törkiyäneñ “PKK/YPG” terror oyışmasına qarşı köräşe Afrinnan soñ Kandil, Sincar häm Mänbiçkä küçte. Kandilgä yünälgän xärbi operaśiyälär aylar êlek başlandı ,Mänbiç öçen Amerika Quşma Ştatları belän diplomatik barış näticäsendä yul kartası planı bilgelände ,Sincar öçen diplomatik häm xärbi operaśiyälär äzerlände.   

Säyӓsӓt, iq’tisad hӓm ictimaği tikşerenülӓr waqıfı SETA tikşerenüçese, yazuçı Can Acunnıň mӓs’ӓlӓ belӓn bӓyle añlatmasın tӓq’dim itӓbez.

Törkiyäneñ terrorğa qarşı köräşenä bäyä birgän ilbaşı Räcäp Tayyip Ärdoğan “Xärbi köçlärebez terrorçılarnı yuq itü öçen adım –adım alğa bara. Oppozisiya telämäsä dä Afrinnı, Cärablusnı,Äl Babnı, Azezne çistartqan kebek Kandildäge terrornı da beteräçäkbez. Separatist oyışmanıñ säyäsi törkemnärenä yuldaş buluçılar tınıçsız bulsa da terrornı bu il kön tärtibennän tulısınça çığaraçaqbız.Kiçä Afrin operaśiyäsenä beldergän rizasızlıqlarnı bügen Kandilgä qarata belderüçelärgä saylawda tiyeşle cawapnı qaytaraçaqbız” dide.

İlbaşı Ärdoğannıñ 11 nçe iyün’dä “Kandil,Sincarğa operaśiyälär başlattıq. 20 oçqıçıbız belän 14 möhim punktnı yuqqa çığardıq. Bu êş äle betmäde, däwam itäçäk “digän süzläre belän räsmi räweştä iğ’lan itelgän Kandil operaśiyäse öçen äzerleklär häm mäydandağı operaśiyälär aylar êlek başladı. Törkiyä maxsus köçläre tawış-tıınsız alıp baruçı operaśiyädä Kandilgä barıp citärgä 24 çaqrım qaldı häm 11 küzätü bazası buldırıldı.

Törkiyä Ğıyraq êçendäge xäräkät belän barı tik Kandilneñ genä tügel,şul uq waqutta terror oyışması Süriyä belän Ğıyraq arasında küçü yulı itep qullanğan Sincar töbägen dä “PKK” häm “YBŞ” kebek terror oyışmalarınnan çistartunı maqsat itep quya.  Ğıyraq üzäk xökümäte häm AQŞnıñ Sincar töbägenä kilep urnaşuınnan soñ “PKK/YBŞ” bilgele ber külämdä töbäktän çigengän ide. Fäqät’ ”PKK/YBŞ” töbäktä haman da qala birä.

Törkiyä terrorğa qarşı köräşen barı tik xärbi operaśiyälär belän genä çiklämi. Şul uq waqıtta tığız diplomatiya da alıp bara. Ğıyraq üzäk xökümäte häm Tön’yaq Ğıyraq regional’ citäkçelegeneñ Ğıyraqta däwam itkän operaśiyägä qarata citdi räweştä reakśiya beldermäwe Törkiyä diplomatiyäseneñ uñışı. Şul uq waqıtta Süriyädä “PKK/YPG” belän bergä xäräkät itkän ABD belän dä Mänbiç töbäge belän bäyle tığız diplomatiya alıp barıldı.

Amerika Quşma Ştatları belän Törkiyä arasındağı diplomatiya näticäsendä ike il Mänbiç öçen yul kartası bilgeläde. Mänbiç planına kürä “PKK/YPG” berlekläre Mänbiç töbägennän Färatnıñ könçığışına çigenäçäk, Törkiyä, AQŞ häm Franśiya urtaq küzätü êşçänlekläre başqaraçaq häm töbäktä bergä xäräkät itäçäk. Soñğı êtapta isä Mänbiç töbägendä yaña cirle parlament häm yaña saqlanu berlekläre qorılaçaq.

Törkiyäneñ Mänbiç mäs’äläsendä AQŞ belän alıp barğan diplomatiya näticäsendä yul kartası bilgeläwe barı tik Mänbiç belän genä çiklänmi. Mänbiç yul kartasınıñ uñışlı räweştä tormışqa aşırıluı Rakka, Deyr ez-Zor häm Tal Abyad kebek urınnarda da şundıy uq yul kartasın ğamälgä kertügä yul açarğa mömkin. Çönki Rakka, Deyr ez-Zor häm Tal Abyad töbäklärendäge cirle xalıq “YPG” zolımınnan tınıçsız.

Ğomumän alğanda yaña terrorğa qarşı köräş doktrinası qısasında şaqtıy uñışqa ireşkän Törkiyä kiläse barışta bik küp çaralar belän terror problemasın beterü yäisä nıqlap kimetü öçen möhim adımnar yasıy. “PKK/YPG” terror oyışmasınıñ soñğı yıllarda Ğıyraq häm Süriyädäge xaostan faydalanıp üz mäydanın kiñäytüennän soñ Törkiyäneñ çik ar’yağı adımnarı terror oyışmasın çikläde häm Törkiyädäge terror höcümnäre kimede. Törkiyä kiläçäktä terrornıñ tamırın qorıtu,anı tulısınça beterü öçen qatğıy adımnar belän alğa bara.