Üzbäk liderı häm çik buyı kileşüe

Üzbäk liderınnan Urta Aziyädä yaña berlek täqdime

Üzbäkstan İlbaşı Şävkät Mirziyayev Urta Aziya illäre töbäk başlıqları berlegeneñ tözelüen täqdim itte.

Cirle matbuğatta çıqqan xäbärlärdä Şävkät Mirziyayevneñ şuşı täqdimne Sämärqandta ütkärelgän “Urta Aziya: däwam itelerlek qalqınu-üseş häm urtaq mullıq öçen xezmättäşlek” xalıqara konferenśiyäsendä telgä aluı belderelde.

Mirziyayev mondıy ber berlekneñ tözelüeneñ Urta Aziya däwlätläreneñ däwam itelerlek üseş aluına yul açaçaq industriya, kapital salu häm intellektual’ potenśialnı buldıraçağın assızıqladı.

Şuşı süzlärenä östäp, Mirziyaev yıl başınnan birle Üzbäkstannıñ töbäk illäre belän säwdä külämeneñ yaqınça 20%, qayber illär belän 70% külämendä artuın belderde. Berläşkän Millätlär Oyışması belgeçlärenä kürä isä, Urta Aziya illäreneñ aldıbızdağı 10 yılda aktiv xezmättäşlege regional’ milli tulayım tabışnı kim digändä ike märtäbä arttıra alır.

7nçe RECCA cıyılışı Aşxabatta ütkärelde

2017nçe yılnıñ 14nçe-15nçe noyabr’ könnärendä ike kön däwam itkän RECCA “Äfğanstan öçen regional’ iqtisadi xezmättäşlek konferenśiyası” Törekmänstan başqalası Aşxabadta uzdı. “RECCA”nıñ 7nçe cıyılışınıñ berençe könendä qatnaş êş forumı oyıştırıldı. Forum programmasınıñ kön tärtibendä törle illärdän kilgän xatın-qız êşmäkärlärneñ oçraşuı bar ide.

Êş forumın Törekmänstan Ministrlar Şurası başlığı urınbasarı Orazmurat Gurbannazarov häm Äfğanstan Däwlät başlığı Äşräf Ganineñ xäläl cefete Rula Gani açıp cibärde.

Açılış çığışlarında Gurbannazarov RECCA platformasına häm Äfğanstannıñ totrıqlılığına birgän ähämiyätläre belän RECCA 7nçe cıyılışına öy xucası buludan şat buluların beldersä, Rula Gani dä qunaqçıllıq häm ike könlek programma öçen Gurbannazarovqa häm Törekmänstan xökümätenä räxmätlären citkerde.

Forumda qatnaşqan Äfğanstan, Törekmänstan, Qırğızstan, Hindıstan, Paqıstan häm Baxreyn xatın-qız êşmäkärläre “Xatın-qız iniśiatorlar: taläplär häm awırlıqlar”, “Xatın-qız käsepçeläreneñ uñışları” temaların ike utırışta söyläşte, täcribäläre häm täqdimnäre belän urtaqlaştı. Äfğanstan ilbaşı Äşräf Ganineñ xanımı Rula Gani dä forum açılışında qatnaşıp xatın-qız iniśiator-käsepçelärne yaqlap çıqtı.

7nçe RECCA cıyılışları qısalarında Äfğanstannıñ häm qatnaşuçı illärneñ säwdä häm sänäğät êşlänmälären tanıtuğa mömkinlek täêmin itü maqsatınnan çığıp Aşxabadta yärminkä dä açıldı. Törekmänstan säwdä häm sänäğät idaräse oyıştırğan yärminkädä Törkiyä Cömhüriyäteneñ Aşxabad ilçelege stend açtı. Törkiyä stendında Törkiyäneñ TİKA aradaşçılığı belän Äfğanstanğa kürsätkän yärdäm häm Törkiyädä ütkärelgän “RECCA” cıyılışlarınnan küreneşlär bulğan videoyazma täqdim itelde. Äfğanstan Däwlät başlığı Äşräf Ganineñ xäläl cefete Rula Gani Törkiyä stendın qaradı. Gani xanımğa Törkiyä ilçelege räsmiläre stend belän bäyle mäğlümat birde.

7. Äfğanstan regional’ iqtisadi xezmättäşlek konferenśiyası RECCAnıñ ministrlar däräcäsendäge cıyılışı 15nçe noyabr’ çärşämbe könne ütkärelde. Törekmänstan Tışqı êşlär ministrı Raşit Märädov räislegendä uzdırılğan cıyılışta Äfğanstan isemennän Däwlät başlığı urınbasarı Särvär Daniş häm Tışqı êşlär ministrı Sälahattin Rabbani qatnaştı. 7nçe “RECCA” cıyılışında Törkiyäne Tışqı êşlär ministrı urınbasarı, tulı wäqalätle ilçe Äxmät Yıldız wäkillek itte.

“Qazaqstan, Üzbäkstan häm Törekmänstan çik buyı kileşüenä imza saldı

9nçı noyabr’dä Qazaqstan, Üzbäkstan häm Törekmänstan cömhüriyätläreneñ tışqı êşlär ministrlarınıñ Sämärqand oçraşuı waqıtında öç il çikläre berläşkän töbäkkä qağılışlı öç yaqlı kileşüne imzalawları açıqlandı.

Räsmi tantanada kileşügä Qazaqstan tışqı êşlär ministrı Qayrat Abdrahmanovnıñ, Törekmänstan tışqı êşlär ministrı Raşit Meredovnıñ häm Üzbäkstan tışqı êşlär ministrı Abdülaziz Qamilovnıñ qul quyu belderelde.

Moñarçı isä il çikläre belän bäyle kileşü barı tik ike yaqlı formatta imzalanuı xäterlätelde.

Qazaqstan tışqı êşlär ministrı Qayrat Abdrahmanov telgä alınğan şuşı kileşüneñ Urta Aziya illäreneñ iminlege öçen tarixi ähämiyätkä iyä buluına basım yasadı.

Monnan alda äytelep uzılğanı kebek, Urta Aziya illäreneñ tışqı êşlär ministrları “Urta Aziya iminlege” temalı cıyılışta da qatnaştı.