Uqtan atu yarışları, İslam teläktäşlege häm Qırğızstanda saylaw

Törki dönya xäbärläre 43

833220
Uqtan atu yarışları, İslam teläktäşlege häm Qırğızstanda saylaw

Qırğızstanda İlbaşı saylawı

15nçe üktäbr’dä Qırğızstan Cömhüriyätendä ilbaşı saylawı ütkärelde. Namzätlärneñ saylaw kampaniyası waqıtında citdi köräş yäşänüen äytep uzarğa kiräk. İlbaşı känäfiye öçen törle säyäsi partiyalardan unber namzät yarıştı. Saylaw aldınnan ike säyäsätçe favoritlar isemlegeneñ berençe urınnarında tordı. Bolardan berse ber ük waqıtta prem'yer-ministr wazıyfasın başqarğan “Qırğızstan sośial’ demokrat” partiyasınnan namzät Sooronbay Ceenbekov.

Ütkärelgän tikşerenülärgä kürä, ikençe köçle kandidat Ömurbäk Babanov buldı. “Qırğızstan Cogorku Känäşi” (parlamentı) xalıq ışanıçlısı, “Cömhüriyät” partiyası liderı O.Babanov monnan aldağı çorlarda da prem'yer-ministr wazıyfasın başqarğan ide. Qırğızstannıñ üzäk saylaw komitetı bastırğan almäğlümätlärgä kürä, “Qırğızstan sośial’ demokrat” partiyasınnan namzät Sooronbay Jeyenbekov 54.75% belän saylawda ciñüçe buldı. İkençe urında, isäplänelgäne kebek Omurbäk Babanov.

Qırğızstandağı saylawğa äzerlek häm oyıştıru üzäge tawışnı sanawnıñ avtomatik sistema aşa başqarıluın belderde. Qırğızstan xökümäte dä saylawnıñ soñğı mäğlümatläreneñ şuşı atnada bilgele bulaçağın açıqladı.

Qırğızstan Cömhüriyäte üzäk saylaw komissiyası başlığı Nurcan Şayıldabekova: “Monnan soñ tawışlar qul belän sanalaçaq. Çit illärdäge saylaw üzäkläreneñ mäğlümatlären kötäbez. Üzäk saylaw komissiyası qanunnarğa kürä 20 kön êçendä İlbaşı saylawının räsmi näticälären açıqlayaçaq”, – dip äytte.

Üzbäkstan-Azärbaycan misalında İslam teläktäşlege

Üzbäkstan belän Azärbaycan din êşläre komitetları bergä oyıştırğan "Üzbäkstan-Azärbaycan misalında İslam teläktäşlege" temalı xalıqara konferenśiya başqala Taşkentta ütkärelde.

Konferenśiyädä Rusiyä Federaśiyäse, Angliya, Germaniya, Qazaqstan, Qırğızstan,Tacikstan, Törekmänstan, Azärbaycan häm Törkiyädän küp sanda citäkçe häm ğalim qatnaştı.

Üzbäkstan prem'yer-ministrı Abdulla Aripov,  Azärbaycan din êşläre däwlät komitetı başlığı Mübariz Qorbanlı, Üzbäkstan din êşläre komitetı başlığı Artık Yusupov qatnaşqan konferenśiyäne açuda Üzbäkstan  İlbaşı Şavkat Mirziyoyev belän Azärbaycan İlbaşı  İlham Aliyevneñ yullamaları uqıldı.

Konferenśiyädä çığış yasawçı Azärbaycan Qavqaz möselmannarı idaräse başlığı Allahşükür Paşazadä, 2017nçe yılnıñ "İslam teläktäşlege yılı” bularaq iğlan itelüenä işaräläp, bu qısada dönyanıñ törle illärendä monıñ belän bäyle çaralarnıñ oyıştırıluın añlattı.

Konferenśiyanıñ ike il arasındağı fänni, mädäni häm humanitar mönäsäbätlärneñ yuğarı däräcägä citkerelüenä öleş kertäçägen ömet itüen äytüçe Paşazadä bu ike millätneñ urtaq tarixqa häm mentalitetqa, fiker yünäleşenä iyä qardäş xalıqlar buluına basım yasadı.

Üzeneñ yäş’lek yıllarınıñ Boxara, Sämärqand häm  Taşkent şähärlärendä uzuın häm şuşı cirlärdä dini belem aluın, ulema häm şäyexülislam däräcäsenä citüendä üzbäk xalqınıñ, anıñ din ğalimnäreneñ öleşeneñ bik zur buluın assızıqlawçı Paşazadä şuña kürä dä Üzbäkstannıñ ruxıy, mäğnävi watanı buluın äytte.

Üzbäkstan möselmannarı dini idaräse başlığı Osmanxan Alimov ta Üzbäkstan häm  Azärbaycan duslığınıñ ike xalıq arasındağı duslıq mönäsäbätläreneñ bik borınğılarğa barıp totaşuın, ike yaqlı ışanıçqa tayanğan mönäsäbätlärneñ monnan soñ da üseş alaçağına ışanuın belderde.

İslam tarix, sänğät häm mädäniyät tikşerenüläre üzäge IRSIKA ğomum direktorı doktor Halit Ärän 2017 İslami teläktäşlek yılı konferenśiyälär tezmäsennän berseneñ uzğan ayda İstanbulda uzdırıluına iğtibarnı yünältte.

Konferensiyädä çığış yasawçı Törkiyä Diyanät êşläre başlığı professor doktor Ali Ärbaş İslam mädäniyätendä häm śivilizaśiyäsendä bik xosusıy urını bulğan, tarix buyı keşelekneñ ofığın yaqtırtqan niçaqlı ğalimnär üskän şuşı qimmätle cirlärdä buludan şat buluın belderde.

TÜRKSOY xalıqara xezmättäşlegen kiñäytä

Kön’yaq Koreya Cömhüriyäteneñ Yeçeon qalasında oyıştırılğan 3nçe Bötendönya tradiśion uqçılıq festivalendä Xalıqara törki mädäniyät oyışması TÜRKSOY belän Bötendönya tradiśion uqçılıq oyışması arasında xezmättäşlek protokolına imza salındı.

TÜRKSOY däräcäle qunaq itep çaqırılğan festival’dä 20dän kübräk ildän tradiśion uqçılıq ölkäsendä êşçänlek alıp baruçı professional’ sportçılar qatnaştı. Törkiyäne Uqçılar waqıfı häm “Tirendaz” cämğiyäte wäkillek itkän festival’dä Qırğızstan, Mongoliya, İndoneziya, Butan, Franśiya, Germaniya häm başqa illärdän kilgän uqçılar üz sälätlären kürsätü belän bergä üz illärendäge uq yasaw barışına qağılışlı seminarlar oyıştırdı.

TÜRKSOY belän Bötendönya tradiśion uqçılıq oyışması arasında xezmättäşlekkä qağılışlı protokolğa qul salu tantanasında çığış yasawçı TÜRKSOY Ğomum särkätip urınbasarı professor doktor Fırat Purtaş tradiśion sport tarmağı bularaq bäyälängän uqçılıqnıñ Awraziyanıñ törle töbäklärendä yäşäwçe törki telle xalıqlar öçen dä tamırları bik borıñğığa barıp totaşqan mädäni miras buluına basım yasadı.

Törki telle xalıqlar arasında qotlanğan Näwrüz, Xızır İlyas, Sabantuy kebek tradiśion bäyrämnärdä köräş, at sportları, uqtan atu yarışları kebek uyınnarnıñ ğasırlardan birle däwam itüenä basım yasawçı Purtaş bügenge köndä dä TÜRKSOY äğzase illärdä êtnosport häm küçmä xalıq uyınnarı iseme belän oyıştırılğan törle festival’lärdä häm bäygelärdä tradiśion uqçılıqnıñ üzgärmäwçe tarmağı buluın belderde.

Festivalneñ professional’ däräcädä äzerlänelüe häm kürsätelgän yuğarı qunaqçılıq öçen Yeçeon şähär xakimiyäte başlığı häm Festival’ komitetı räisenä räxmätlären citkerüçe Purtaş qısqa waqıt êçendä Yeçeonnıñ markasına äylängän Bötendönya uqçılıq festivalen tradiśion sport tarmaqları aradaşçılığı belän mädäniyätlärne häm cämğiyätlärneñ ber-bersenä yaqınaytqan tınıçlıq kereşüe bularaq kürülären assızıqlap äytep uzdı.



Bäyläneşle xäbärlär