Xalıqara Altın Qaraküz xalıq biyüläre bäygeseneň bıyılğı ciňüçese - Qazaqstan

Törki dönya xäbärläre 30

775242
Xalıqara Altın Qaraküz xalıq biyüläre bäygeseneň bıyılğı ciňüçese - Qazaqstan

Azärbaycan

Baqıda Törkiyä – Azärbaycan – Törekmänstan tışqı êşlär ministrlarınıň öç yaqlı 4 nçe cıyılışı uzdı.

Cıyılış qısasında Törkiyä Cömhüriyte tışqı êşlär ministrı Mävlüt Çavuşoğlu ,Azärbaycan tışqı êşlär ministrı Älmar Mämmädyarov häm Törekmänstan tışqı êşlär ministrı Räşid Märädov ike yaqlı söyläşülärdän soň öç yaqlı cıyılış ütkärde. Ministrlar cıyılış azağında urtaq beldergegä qul quydı.

Soňraq matbuğat oçraşuı ütkärelde. Matbuğat oçraşuında çığış yasağan Mävlüt Çavuşoğlu ike yaqlı söyläşülärdä illär arasındağı mönäsäbätlär häm regional’ mäs’älälär xaqında söyläşülären, öç yaqlı cıyılışta isä Törkiyä – Azärbaycan – Törekmänstan arasındağı mönäsäbätlärne üsterü xaqında süz alıp baruların citkerde.

Törkiyä tışqı êşlär ministrı Çavuşoğlu Yuğarı Qarabax problemasınıň xalıqara xoquq qağidäläre ,Azärbaycannıň möstäqil’lege häm cir bötenlege qısasında iň qısqa waqıt êçendä çişelüe kiräklegen belderep “Bu mäs’älädä xalıqara cämäğät’çelekne häm Minsk törkemen tağın da aktiv bulırğa çaqırabız”dide.

”Ber poyas, ber yul” proyektında Törkiyä, Azarbaycan , Törekmänstan häm Gruziyanıň zur ähämiyätka iyä buluın beldergän Çavuşoğlu geopolitik poziŝiyäne küzdä totıp bu proyektta möhim rol’ başqaraçaqların assızıqladı.

Törkiyä tışqı êşlar ministrı Mävlüt Çavuşoğlu: “Ênergiya belän bäyle xezmättäşlegebezne tağın da nığıtırğa , üsterergä telibez. Möhim qararlar yuğarı däräcäle oçraşularda qabul itelä. Bıyıl Törekmänstanda öç yaqlı däwlät başlıqları cıyılışı ütkäreläçäk. Bu oçraşunıň näticäle bulaçağı turında barıbız da urtaq fikerdä. Cıyılışta kileşülär dä imzalanaçaq”,-dide.

Azärbaycan tışqı êşlär ministrı Mämmädyarov Azärbaycan tabiği gazın Awrupağa ireşteräçäk Kön’yaq gaz yulı proyektınıň kiläse yılda êşkä kereşäçägen ,Törekmänstannıň da bu proyekt belän qızıqsınuın belderde.

Älmar Mämmädyarov: “Proyektnıň ber öleşe bulğan TANAP 2018 nçe yılda tögällänäçäk. Kiläse yılda Törkiyägä 6 milliard kub metr tabiği gaz cibäräçäkbez. Annan soňğı yılda 10 milliard kub metr tabiği gaz İtaliya bazarına citkereläçäk”,-dide. 

Törekmänstan tışqı êşlär ministrı Märädov ta Azärbaycan häm Törkiyä belän iq’tisad, säyäsät häm ênergetika tarmaqlarında mönäsäbatlärne üsterergä teläwlären citkerde.

Ministrlar qul quyğan urtaq beldergedä illärneň bäysezlege häm cir bötenlegeneň ähämiyätenä, kileşmäwçänleklärneň xalıqara xoquq qağidäläre qısasında çişelüe kiräklegenä ,Törkiyä – Azärbaycan –Törekmänstannıň xalıqara oyışmalarda urtaq xäräkät itüeneň ähämiyätenä basım yasaldı.  

 

TÜRKSOY belän Bursa şähär xakimiyäte xezmättäşlegendä uzğan häm dönyanıň 22  mädäniyatın ber ük şähärdä oçraştırğan 31 nçe Xalıqara Altın Qaraküz xalıq biyüläre bäygeseneň bıyılğı ciňüçese Qazaqstan buldı.

Bursa mädäniyat sänğät’ häm turizm waqıfı yärdäme belän 56 nçı Xalıqara Bursa festivale qısasında oyıştırılğan bäyge 7-12 nçe iyül’ könnärendä Törkiyäneň Bursa qalasında uzdı.

 Argentina,Albaniya ,Azärbaycan, Başqortstan, Belarus’, Bosniya – Gerŝegovina, Bolgariya, Qıtay, Filippinnar,Gruziya, Hindıstan , Çernogoriya,Qazaqstan,Qırğızstan,Kosovo, Tön’yaq Kipr Törek Cömhüriyäte ,Makedoniya, Moldova,Rumıniya, Çili, Tatarstan häm Ugandadan kilgän biyü törkemnäre şähärneň törle urınnarındağı säxnälärdä çığış yasap üz mädäniyatların tanıttı.

Bäygedä TÜRKSOYnıň çaqıruı belän Azärbaycannan “Cangi”,Qazaqstannan “Kazyna”,Qırğızstannan “Agat-Taajy”,Tatarstannan“Altınay”,Başqortstannan“Veselinka”,Tön’yaq Kipr Törek Cömhüriyätennän isä däwlät xalıq biyüläre ansamble qatnaştı. Milli kiyemnär belän çığış yasağan biyüçelär bersennän berse matur biyüläre belän tamaşaçılarnıň küňelen yawladı.

Jyuri bäygedä berençe urınnı Qazaqstannıň Çimkänt qalasınnan kilgän “Kazyna” biyü törkemenä birde. Älege biyü törkemenä Altın Qaraküz büläge tapşırıldı. Bäyge qısasında här yıl tapşırılğan “TÜRKSOY” oyışmasınıň  maxsus bülägenä isä bıyıl Tön’yaq Kipr Törek Cömhüriyäteneň däwlät xalıq biyüläre ansamble layıq buldı.

 Bäygedä berençe urınnı yawlğan Qazaqstan biyü törkemenä Altın Qaraküz büläge belän bergä 5 meň yevro , 2 nçe urınnı alğan Moldova biyü törkemenä Kömeş Qaraküz büläge häm 3 meň yevro, öçençe urınğa layıq bulğan Gruziya biyü törkemenä “Bronza Qaraküz” büläge belän 2 meň yevro aqçalata büläk tapşırıldı.Rumıniya häm Azärbaycannan kilgän biyü törkemnäre dä çığışları yuğarı bäyälänep büläklär aldı.

 Büläklärne tapşıru tantanasınnan soň bäygedä berençe bulğan Qazaqstan biyü törkeme qabat üz çığışın täq’dim itte. 

 

Urta Aziya

Qırğızstan watandaşları yäşäw röxsäte bulmıyça Qazaqstanda 30 kön qala ala.

Ağımdağı yılnıň 15 nçe iyülendä Qırğızstan häm Qazaqstan xökümätläre arasında bu illär watandaşlarınıň ike ildä qalu waqıtın bilgeläwçe kileşü ğamälgä kerde.

Qazaqstan tışqı êşlär ministrlığınıň matbuğat xezmäte beldergänçä, Qırğızstan watandaşları monnan soň Qazaqstanda yäşäw terkäwe bulmıyça torıp 30 kön qala ala.Êlegräk isä bu waqıt 5 kön ide.

Qazaqstanda 30 könnän kübräk qalırğa teläwçe Qırğızstan watandaşları Qazaqstan êçke êşlär ministrlığında terkäw uzarğa tiyeş. Qırğızstanğa baruçı Qazaqstan watandaşları da moňa oxşaş qağidälärne ütärgä tiyeş.

 

Üzbäkstan

Üzbäkstan xökümäte ağımdağı yılda xalıqara finans oyışmaları belän 1 milliard 24 million dollar külämendäge kredit kileşüenä qul quydı.

Üzbäkstan finans ministrlığı beldergänçä, xökümät bıyılnıň aprel’ – iyün’ aylarında tuplam  bäyäse 470 million 200 meň dollar bulğan proyektların tormışqa aşıru qısasında 413 million dollar külämendä 4 kredit kileşüe imzaladı.

Ağımdağı yılnıň ğinwar – mart aylarında tuplam bäyäse 611 million 400 meň dollar bulğan 6 kredit kileşüenä imza salındı.Üzbäkstan xökümäte ildä ğamälgä aşırılaçaq 10 proyekt qısasında yıl başınnan birle 1 milliard 24 million dollar çit il kreditın üzenä cälep itte.

 

 



Bäyläneşle xäbärlär