Törki dönya xäbärläre 26

Azärbaycan, Üzbäkstan,Törkiyä,Tatarstan xäbärläre

757273
Törki dönya xäbärläre 26

Azärbaycan

Nobel’ büläge iyäse törek ğalime professor doktor Aziz Sancar Azärbaycan däwlät iq’tisad universitetı uquçı yäşläre belän oçraştı.

Sancar başqala Baqığa Azärbaycan mäğärif ministrlığınıň çaqıruı buyınça kilde häm yuğarı uqu yortında studentlar belän oçraştı.

Üz çığışında küp êşläw näticäsendä uňışlarğa ireşüen assızıqlawçı Sancar studentlarnı küp êşlärgä häm keşeleklären onıtmasqa çaqırdı.

Professor doktor Sancar çit ildä yäşägändä küňelendä härwaqıt Törkiyä häm törki dönya buluın belderep “Çit illärgä barıp alarnıň telen öyränsägez dä alar sezgä törek diyäçäk. Üz keşelegegez, üz millätegez belän ğorurlanığız, amerikalı da, ingliz dä sezgä xörmät kürsätsen”dide. 

Amerika Quşma Ştatlarında Törek yortı buldıruın da beldergän Sancar “Bu yortnıň maqsatı – Törkiyä häm törki dönyanı tanıtu, tikşerenü êşçänlekläre öçen AQŞqa kilgän törek uqıtuçı-ğalimnärgä biredä qalırğa mömkinlek tudıru häm uquçı yäş’lärneň AQŞqa iyäläşüenä yärdäm itü. Nobel’dän kilgän aqçanıň da zur öleşen biregä küçerdek”dide.

Azärbaycan däwlät iq’tisad universitetı rektorı Adalet Muradov ta qatnaşqan cıyılışta Sancar studentlarnıň sorawlarına cawap birde.

Professor doktor Aziz Sancar Baqı säfäre qısasında mäğärif ministrlığı häm Azärbaycan däwlät iq’tisad universitetı bergä oyıştırğan “Universitetlarda fänni êşçänleklärneň zamanca idarä modele” isemle konferenŝiyädä çığış yasadı.

Üzbäkstan

”Anadolu” agentlığı xäbärenä kürä, Üzbäkstan Törekmänstan tabiği gazın Kön’yaq Aziya illärenä qudırunı küzdä totuçı TAPİ proyektında urın alu mömkinleklären tikşerep öyränü öçen êşçänlek başlattı.

“Üzbäkneftgaz” başlığı Alişer Sultanov bu mäs’äläneň ilbaşı Şäwkat Mirziyayevnıň Törekmänstanğa soňğı säfärendä kön tärtibenä kilüen belderep “Törekmänstan bezgä TAPİ proyektında qatnaşunı täq’dim itte. İlbaşı Mirziyayev “Üzbäkneftgaz”nıň bu mäs’äläne tikşerep öyränüen soradı”dide. 

Xäzergä Üzbäkstannıň älege proyektqa quşıluı belän bäyle räsmi möräcäğät’neň bulmawın beldergän Sultanov proyektnıň ildä citeşterelgän tabiği gaznı êksportlaw yulların arttıru öçen yaxşı mömkinlek buluın häm bu säbäple proyekt belän qızıqsınuların citkerde.

TAPİ proyektı qısasında 2015 nçe yılnıň dekabr’ ayında başlanğan häm Törekmänstannıň kön’yağındağı Galkınış tabiğ gaz çığanağınnan Äfganstan çigenä qadär 214 çaqrım ozınlığındağı ütkärgeç tözeleşeneň yıl axırında tämamlanuı küzdä totıla.

Törekmänstan tabiği gazın Äfganstan aşa Paqıstanğa häm Hindıstanğa cibärüne küzdä totuçı TAPİ tormışqa aşırılğanda yıllıq urtaça 33 milliard kub metr Törekmänstan gazın küçerü planlaştırıla.

Törkiyä

Törkiyädä “Olı dalanıň ulı Çıňğız Aytmatov” isemle kitap basılıp çıqtı. Kitapta 12 yazuçınıň Aytmatovnıň äsärläre, şäxsi üzençälekläre, äsärlärendäge töp temalar xaqında mäqaläläre urın ala.

Kitap Ärcan Köksal yazğan Çıňğız Aytmatovnıň biografiyäse belän başlana. Yağmur Tunalı “Çıňğız Aytmatovnı beläsezme?” isemle yazmasında yazuçınıň äsärlären nigä uqu kiräklegen aňlata. Ülkü Eliuz isä Aytmatov äsärlärendäge xatın-qız obrazlarına tuqtala. Siyami Yozgat  Aytmatov äsärlärendä kiň urın alıp torğan atlar turında süz alıp bara. Turgay Yalanız “Aq köymä” xikäse belän bäyle äti temasın yaqtırta. M. Fatih Kanter romannardağı mäxäbbät temasına tuqtala.

Kitapta şulay uq Bahtiyar Aslan ,Ayşä Yılmaz Balkan, Sabahattin Çağın, İmdat Avşar, Sälami Akcäläp, Ali Tavşanlıoğlu häm Mostafa Uçurumnıň mäqaläläre dä urın ala.

Törki häm dönya ädäbiyatınıň tanılğan şäxese bulğan Çıňğız Aytmatov xaqında centlekle mäğ’lümat birelgän älege kitap yazuçını tanırğa teläwçelär öçen möhim çığanaq bulıp tora.

Tatarstan

Törkiyädäge universitetlarnı tämamlağan yäş’är Tatarstan Cömhüriyäte başqalası Qazanda oçraştı.

Törle yıllarda Törkiyädäge yuğarı uqu yortlarında belem alğan Tatarstannan häm Çuvaşstannan 30 dan kübräk keşe 3 nçe tradiŝion oçraşuda qatnaştı.

Törkiyäneň Qazandağı konsullığı binasında oyıştırılğan çarada baş konsul Turhan Dilmaç,çit illärdä yäşäwçe töreklär häm tuğandaş cämğiyät’lär räislege räsmi zatı Mäxmät Kılıç qatnaştı.

Mäxmat Kılıç biredä yasağan çığışında Rusiya külämendä Törkiyädäge universietlarnı tämamlağan 3 meňnän kübräk keşe buluın , kiläçäktä alar belän xezmättäşlekne arttırırğa teläwlären belderde.

Xäzerge waqıtta Rusiyädän 300 studentnıň Törkiyädä  stipendiyäle uquın beldergän Kılıç üz mömkinlekläre kitkän uquçı yä’lärne dä küz uňında totqanda 1500 tiräse student buluı turında uylawların citkerde. 

Rusiya külämendä här yıl 100 keşegä stipendiya birülären beldergän Mäxmät Kılıç alarnıň yaqınça 30ınıň Tatarstan studentlarına birelüen äytte.

Törkiyäneň Qazandağı baş konsulı Turhan Dilmaç Törkiyädä belem aluçı yäisä Törkiyädäge uqu yortların tämamlawçılar belän härwaqıt bergä buluğa zur ähämiyät birülären belderde.

Çarada qatnaşuçılar törek rizıqları belän sıylandı häm Törkiyä bayrağı yanında istälekkä räsemgä töşte.

 

 



Bäyläneşle xäbärlär