Törek wä tatar dönyasında 2016 yıl

“Törek wä tatar dönyasında” tapşıruı. 11.01.2017

647693
Törek wä tatar dönyasında 2016 yıl

Bügenge yazmada 2016nçı yılda “Törek wä tatar dönyasında” säxifäsendä dönya kürgän qayber yazmalarğa häm äñgämälärgä qısqaça küzätü täqdim itäbez.

Tatar ädipläre iskä alındı

Törkiyä başqalası Änkarada urnaşqan “İdilya" tatar aşları yortında 2016nçı yılnıñ 28nçe fevral yäkşämbe könne İdel-Ural tatarlarınıñ milli azatlıq xäräkäteneñ äydäp baruçısı, tanılğan cämäğät êşleklese häm yazuçı Ğayaz İsxaqine häm qırım tatarlarınıñ tanılğan säyäsät êşleklese, şağir häm yazuçı Numan Çäläbicihannı iskä alu kiçäse ütkärelde.

Tikşerenüçe häm yazuçı Ömär Özcan Ğayaz İsxaqinıñ tormışı, säyäsi häm icadi eşçänlege turında täfsille mäğlümat birep uzdı. 

 “Qırım törkiläre mädäniyät häm yärdämläşü" cämğiyäte ğomum başlığı Tuncär Kalkay qırım tatarlarınıñ tanılğan säyäsät êşleklese, şağir häm yazuçı Numan Çäläbicihan turında çığış yasadı.

Ädäbiyat häm cämğiyät simpoziumında tatarlar

Törkiyäneñ Bartın universitetında Xalıqara ädäbiyat häm cämğiyät simpoziumı ütkärelde. Törle il ğalimnäre qatnaşqan xalıqara fänni cıyında tatarlar da wäkillek itelde.

Adıyaman universitetınıñ turizm fakultetı dekanı professor doktor Ramilä Yarullina Yıldırım fänni cıyın turında mäğlümat birep uzdı.

“Musa Carullah Bigine ätiyem törmädän azat itte”

2016nçı yılnıñ aprel’ ayında Rusiyä Federatsiyäseneñ Sankt-Peterburg qalasında Musa Carullah Bigigä bağışlap inde öçençe tapqır oyıştırılğan Xalıqara konferentsiyädä Paqıstannan qatnaşqan üzbäk jurnalistı Oğuz Haşmioğlı “Törkiyä awazı” radiosında qunaqta bulıp fikerläre belän urtaqlaştı.

Dilmaç: “TRT Tatar - tatarlar öçen al’ternativ çığanaq”

2016nçı yılda “Törkiyä awazı” dulqınnarında Törkiyä Cömhüriyäteneñ Tatarstan başqalası Qazandağı baş konsulı Turhan Dilmaç belän äñgämä täqdim ittek.

Yıldırım Tatarstanda, Miñnexanov Törkiyädä

Törkiyä premyer-ministrı Rusiyägä safäre qısalarında Tatarstanda oçraşular ütkärde.

Törkiyä Premyer-ministrı Binali Yıldırım häm Tatarstan İlbaşı Röstäm Miñnexanov qatnaşuında başqala Qazandağı İstanbul parkında tanılğan cämäğät häm säyäsät êşleklese, ğalim Sadri Maqsudi häykäle açıldı.

Törkiyä Premyer-ministrı Binali Yıldırımnıñ Rusiyä Federaśiyäse säfäre qısalarında Tatarstanda oçraşular ütkärüennän soñ 15nçe dekabr’ könne Tatarstan İlbaşı Röstäm Miñnexanov citäkçelegendäge wäkillek Törkiyä başqalası Änkarada bulıp kitte.

Änkarada Ali Aqış iskä alındı

Törkiyä başqalası Änkarada urnaşqan “İdiliya” tatar aşları yortında 2016nçı yılnıñ 17nçe dekabr’ könne Bötendönya tatar ligasınıñ berençe qoruçı başlığı, kürenekle cämäğät êşleklese, jurnalist Ali Aqışnıñ ülemenä 5 yıl tulu mönäsäbäte belän iskä alu kiçäse ütkärelde.

Tikşerenüçe-ğalim Ömär Özcan 2011nçe yılnıñ 17nçe iyül’ könne wafat bulğan Ali ağanıñ Törkiyädäge, Germaniyadağı, Pol’şadağı, Misırdağı tormışı häm êşçänlege, fikerläre häm äsärläre turında täfsille mäğlümat birep uzdı.

20nçe ğasır başında İdel-Ural yaqlarında tözelgän Millät Mäcleseneñ başlığı, Rusiyä Duması häm Törkiyä parlamentı xalıq ışanıçlısı, tanılğan cämäğät êşleklese, ğalim Sadri Maqsudineñ onığı, Törkiyäneñ berençe xatın-qız ilçese Adilä Aydanıñ qızı, tatar şağire Därdmänneñ tuğanı, Bötendönya tatar ligasınıñ bügenge başlığı, yazuçı häm ğalimä Gönül Pultar da Ali Aqış turındağı xatiräläre belän urtaqlaştı.

Qırım tatarları cämğiyäte ğomum başlığı Tuncär Qalqay da Ali Aqışnı xörmät belän iskä aldı.



Bäyläneşle xäbärlär