Nogayça 83: Kabıl bolgan bır duva (1)

Kur’an’da atı ötken

Bîr üyken Paygambar,

Hazreti Yunus(as) bolgan.

Kur’an’da aytılgan soy,    

Yunus(as) bîr duva qılgan...

Sosı etken duvasını,          

Allah tez oq qabıl qılgan...

Ol sebepten nav dua,       

Qabıl bolgan dualardıñ

En üykeni dep bilingen.  

Em basqa dualardıñ       

Qabılına sebep bolgan...

Sosı Yunus Paygambar’dıng (as)

Duvasına sebeb bolgan

Abıraylı qıssası,                

Qısqaca dep aytılgan:

Deñizge atılganda,          

Sonı üyken balıq yutqan...

Keşelik em qarangıda,     

Deñiz pırtınalı bolgan.       

Dört bîr yagını biyik,          

Üyken tolqınlar sargan...

Äş bîr yaqtan umut yoq,           

Em şarasız qalganda,

Yunus (as) balıq qursagında,

Nav manege kelgen

Sözlerimen yalbargan:

“Allah’ım senden basqa  

Äş bir Kuday bolmagan!  

Sen barı qusurdan,

Bizlerdeki noqsandan      

Köp ereksin Allah’ım!

Men zalımlardan bolganman!”

Munavı duasını,         

Eter etpes ol Yunus(as),

Tez oq hamen qabıl bolup   

Qurtulmaga sebep bolgan...

Yunus’tıñ (as) so duvasında,

Hıylı üyken sırlar bolgan:

Nege desek so alde,                 

Sebeplerdiñ baresi,

Äş paydasız susup qalgan...

Navı aldeki Yunus’tı (as),

 Balıktıñ qursagından

Qurtarıyaq kim bolsa, 

Ökmi basta balıqqa,  

Deñizge em keşege,

Tagı kökke, havaga,      

Ötkeni kerek bolgan...

Nege desek Yunus’qa(as)      

Keşe, deñiz em balıq

Zarar üşün birleşken...    

Nav üşevini birden,

Emri astına algan,           

Anca onı qurtargan...  

Eger halqtıñ baresi         

So Hazreti Yunus’tıñ (as)

Qızmetinde bolgay edi,  

Tagı bîr de kömekşi;   

Sosınlardan bîr yaravış,

Kelmes edi; em baresi, 

Bes para payda bolmay 

Qolı baylı qalır edi...

Sebeplerdiñ  akikatte, 

Üşünley bîr teysiri yoq...

Özine tayanılayaq   

Sebeplerdin sebebi,  

Allah bolganını Yunus (as),

Közimen körgen üşün;

Allah’tıng birligini,  

Küşi soñsız bolganını,   

Yalgız Quday sözining

Är zatqa ötkenini, 

Sosı almen taga da

Tap manemen körgen üşün,

Ta yüreginin işinden 

Allah (cc) betke döngen üşün,  

Ene sosı duvası,

Keşe, deñiz em balıqtı,     

Yunus’tıñ (as) qızmetine

Bergenge sebep bolgan...

Sosı bîrlik nurıman, 

Är bîr zattıñ yalgızca  

Bîr Allah’tan bolganına,  

Tap manemen inanganı,      

Yunus aleyhisselam’ga

Balıqtıñ qursagını,     

Deniz astı kemesi;

Tolqınları tavlarday   

Senkildegen dahşatli,      

Aşuvlangan deñizdi,

Amniyetli tüz togay,

Seyran qılıngan meydan, 

Etip bergen so iyman..

Ziyadası sosı nur,       

Tagı kökti buluttan    

Tazalap em sıpırıp

Bası üstünde Ay’dı,       

Bîr şeraqday ilgen...

Är yaqtan Yunus’tı (as)    

Qorqustqan, sıqıştırgan 

Tögerekte  maqluqlar,     

Är yaqtan Yunus’ka (as),

Dostlıq beti körsetken...

Soñda YunusPaygambar (as),    

Selametpen şetke şıgıp,

Yaqtin degen terektiñ         

Astında tap tıñşayıp,   

Quday’dan soga kelgen        

Neşe yahşılıqtı körgen...

Qalganga keliyek yuma,      

Devam etiyek inşallah...

Savlıqpan qalıñız!

Dr. Yusuf  ALTINIŞIK

E-mail: altinisikyusuf@gmail.com