Törkiyä humanitar yärdäm oyışmalarınıñ Ramazan ayı eşçänlekläre

 Üzara yärdämläşü ayı bulğan Ramazan ayınıñ 2 atnası uzıp ta kitte. Böten İslam dönyasında Ramazan ığı-zığısı xökem sörä. Axşam azanınnan elek barlıq äzerleklärne tögälläw, härkemneñ tabında üz urının aluı öçen bu tırışlıqlar.  Balalar yaña peşkän ikmäk alu öçen çiratqa tezelä. Ramazan ayında maxsus peşerelgän yassı kölçälärne öygä alıp qaytqanda aşıy da başlıylar. Mondıy küñelle ığı-zığını öylärdä genä tügel awıllarda häm şähärlärdä dä kürergä mömkin. Här cirdä yaxşı möğalämä atmosferası xökem sörä.

Böten İslam dönyasında küzätelgän bu ığı-zığı Törkiyädä dä bar. Ämma Törkiyädä monıñ tağın başqa ber yağın da küräbez. Törkiyäneñ humanitar yärdäm oyışmaları dönyanıñ törle poçmaqlarındağı iftar tabınnarı buş qalmasın öçen zur tırışlıq kürsätä. Yärdäm oyışmalar här tabınğa rizıq quyu öçen üzara yarışa.

“Qızılay”,"Keşe xoquqları häm xörriyätläre”(İHH),”Diñgez mayağı”humanitar yärdäm oyışmaları başta eşçänleklären Törkiyädäge iftar tabınnarı öçen planlaştırdı. Törkiyädäge yaqınça 3 million süriyäle sıyınuçılar da onıtılmadı. Annan soñ Afrikadan Aziyağa ,Awrupadan Amerikağa qadär qayda küpme moxtac keşe bulsa alarğa yärdäm ireşterü öçen eşçänleklär başqarıldı. Törkiyä yärdäm oyışmaları Ramazan ayı öçen yaqınça 150 million törek lirası sarıf itte.

 “Qızılay” oyışması ozaq yıllar yärdäm itkän illär öçen Ramazan ayına maxsus eşçänlek başlattı. Ğazzä, Somali, Bangladeş, Äfganstan,Paqıstan ,Ğiraq öçen äzerleklär başqarıldı. “Qızılay” oyışması 27 ilgä Ramazan ayı yärdämnären citkeräçäk. Qayber illärdä qaynar rizıq bireläçäk,qayberlärendä azıq-tölek paketları taratılaçaq.Qaysıdır illärdä igelek kürsätüçelärneñ zäqätläre belän iftar tabınnarı äzerlänäçäk. “Qızılay” oyışması Törkiyädä häm çit illärdä tuplam 100 meñ azıq-tölek paketı taratunı planlaştıra. Här paket 5 keşek ğailäneñ 1 aylıq ixtıyacların qanäğätländerä.

500 meñ keşe älege azıq-tölek yärdämnäre belän törek xalqınıñ yärdäm,igelek söyüen añlayaçaq. Somalida här kön 8 meñ keşegä qaynar rizıq taratu däwam itäçäk. Teläwçelärgä säxär aşı da bireläçäk. Ğazzädä häm Ğiraqta iftar çatırları qorılaçaq. “Qızılay” oyışmasına yärdäm itärgä teläwçelär oyışmanıñ internet säxifäse aşa üz öleşen kertä ala.

”Keşe xoquqları häm xörriyätläre”(İHH)humanitar yärdäm waqıfı bıyılğı Ramazan ayı eşçänleklären tağın da kiñäytkän oyışmalar arasında urın ala. Älege oyışma Könyaq Amerika ile Ekvadordan Aziya ile Tailandqa,Könyaq Afrika Cömhüriyätennän Myanmağa qadär 69 ildä iftar häm säxär çatırları qoraçaq.“Keşe xoquqları häm xörriyätläre”(İHH)humanitar yärdäm waqıfı bu çatırlarğa kilä almawçılarğa azıq-tölek paketları da tarataçaq. Oyışmanıñ  Ramazan ayı yärdämnäre öçen küzdä totqan aqça miqdarı  70 million törek lirası täşkil itä.Bu byudjet dönyanıñ törle poçmaqlarında  suğışlar häm afätlär arqasında yätim qalğan balalarnı söyenderü öçen dä qullanılaçaq.

Ramazan ayında Törkiyäneñ moxtaclarğa yärdämnärenä “Diñgez mayağı” cämğiyäte dä öleş kertäçäk. Alarnıñ maqsatları da bik zur. Cämğiyät Äfganstan, Albaniya, Azärbaycan,Bangladeş,Bosniya,Keniya,Makedoniya,Benin, Mavritaniya ,Şri-Lanka ,Qazaqstanğa yärdäm ireşteräçäk. “Diñgez mayağı” cämğiyäte 32 ildä iftar tabınnarı äzerläwne planlaştıra. 32 ildä 32 meñ keşegä Törkiyäneñ yärdäme belän awız açtırırğa teli. Cämğiyät 5 meñ keşegä azıq-tölek taratunı häm 4500 yätim balanı bäyrämdä yaña kiyemnär belän söyenderüne maqsat itep quya. 

Bolardan tış Törkiyä diyänät waqıfı ,Törek xezmättäşlek häm koordinatsiya agentlığı TİKA,distälärçä erele-waqlı humanitar yärdäm cämğiyäte dönyanıñ här poçmağına yärdäm ireşterü öçen eşçänlek başqara. Ramazan mönäsäbäte belän duslıq bäyläneşlären tağın da nığıtalar. Dönyadağı yärdämgä moxtac möselmannar şunı bik yaxşı belä: alarnıñ uraza totarğa niyätlänüe citä. Kiçen niçek awız açarmın dip qayğırırğa,säxärdä närsä aşarmın ikän dip borçılırğa kiräkmi. “Yärdämgä moxtacmın”digändä ber törek oyışmasınıñ alarğa yärdäm qulı suzuına ışana alar.

Törkiyä näq menä bu eşçänlekläre näticäsendä küñellärdä ,yöräklärdä duslıq küperläre urnaştıra. Böten dönyanı üz ile itep kürä. Törek keşese şunı yaxşı belä:dönyanıñ här poçmağında anı tuğannarça, duşlarca qarşı alaçaq keşelär yäşi.

S