Törkiyädän yärdämnär 05
Bayırbucak törekmännäreneñ Süriyä rejim köçläre ,Rusiya häm İrannıñ yärdäme belän oyıştırılğan höcümnärdän soñğı wäzğiyäte
Süriyädä rejim köçläre Rusiya häm İrannıñ yaqlaw kürsätüe belän törekmännär meñ yıl bıyı yäşägän Bayırbucak töbägenä höcümnären arttırdı.Bügezge yazmabızda Törkiyä “Qızılay” yärdäm oyışmasınıñ matbuğat kiñäşçese Sälahattin Bostannıñ älege höcümnär arqasında tuıp-üskän cirlären taşlap kitärgä mäcbür bulğan törekmännärneñ wäzğiyäte xaqındağı fikerlären citkeräbez.
Törekmännär alarğa ber il qazandırğan, alar törekmännärne yäşägän cirlärennän qua. Äye süz Süriyädäge törekmännär turında bara. Süriyädäge törekmännärneñ tarixı bik borınğığa barıp totaşa. Törekmännärneñ bu cirlärgä berence kilep urnaşuları 10 nçı häm 11 nçe ğasırlarda bula. Meñ yıl buyı ber ük cirdä yäşäwçe xalıq xäzer isä mäcbüri küçep kitügä etärelä. Kitärgä telämäwçelär isä bombalana.
1096 nçı yılda Böyek Xaç säfärläre başlanğanda bügenge Süriyäne xaçlılardan saqlawçı Sälahattin Äyyubi komandirlığındağı armiyäneñ möhim öleşen törekmännär täşkil itä. Xaç säfärläre çigenderelä. Soñraq Ğosmanlı imperatorlığı ximayäsenä kergän Süriyädä törle etnik çığışlı,törle teldä söyläşüçe häm törle dinnär totuçı keşelär 400 yıl buyı tınıç-tatu yäşi.
Tikşerenülär kürsätkänçä, Süriyädä törki teldä söyläşüçe yaqınça 1 million yarım törekmän bar. Tellären onıtuçılar belän bergä bu san 3 millionğa qadär citä.
Törki teldä söyläşüçe,yäğni asıl mädäniyatın saqlawçılar belän Anadoludağı törekmän qawemnären ayıru mömkin tügel diyärlek. Meñ yıldır watannarı itep qabul itkän cirlärdä törekmännärgä xäzer isä suğış yanıy.
Törekmännär yäşägän cirlärgä höcüm itüçe Süriyä rejim köçläre, Rusiya berlekläre, İran ğaskärläre häm Hizbullah suğışçılarınıñ nigeznamäse – “DEAŞ”terror oyışmasına qarşı köräş. Ämma törekmännär häm Törkiyä dä äytüençä ,Bayırbucak törekmännäre yäşägän urınnarda ber genä dä “DEAŞ” oyışması äğzası yuq. Höcüm itüçe köçlär höcümnären ber genä anıq dälilgä dä nigezländerä almıy. Barı tik “Bez “DEAŞ” terror oyışmasına qarşı köräşäbez”dilär alar. Bu köräştä zıyan kürüçülär isä öslärenä bomba töşkän balalar,qoçaqlarındağı balalar belän küçep kitärgä mäcbür itelgän xatın-qızlar häm köçkä genä yöri torğan olı yäştäge keşelär.
Törkiyä Batyırbucak törekmännärenä yärdäm itä. Höcümnär başlanğannan alıp bügenge köngä qadär törek xalqı törekmännärne onıtmadı. Törekmän tawları itäklärendä qorılğan Yamadi lagerı böten Törkiyädän cibärelgän yärdämnär belän qışnı uzdıra ide. Törkiyäneñ “Qızılay” yärdäm oyışması belän afät häm ğadättän tış xällär idaräse yaqınça 20 meñ keşeneñ ixtıyacın qanäğätländerä.Yärdämnärneñ berdänber maqsatı- törekmännär qabat öylärenä qaytqanğa qadär qıyınlıq kürmäsen, aç qalmasın,balalar salqınnan ülmäsen.
Xäzer isä wäzğiyät başqaça. Törekmännärgä höcüm itüçe köçlär suğış xoquqı, keşe xoquqları kebek global qağidälärgä dä iğtibar itmilär. Tınıç xalıq urnaşqan lagerlarğa yaqın urınnarğa bombalar ırğıtalar. Yamadi lagerı häm anıñ tirä-yağına cirläşkän törekmännär qabat küçep kitügä mäcbür itelä. Bu yulı yul -Törkiyä çik buyınıñ eçke yağı,yäğni töp Watan.
Törkiyä älbättä törekmän qardäşlärenä qulındağı ikmägeneñ yartısın birergä äzer. Xäzergä kilüçelärneñ sanı bik küp tügei. Ämma bu artırğa mömkin. Un meñ bulsa da ,yöz meñ bulsa da Törkiyä beräwne dä aç qaldrmas. Afät häm ğadättän tış xällar idaräse belän “Qızılay” yärdäm oyışması sıyınuçılar öçen ike lager äzerläde. Törkiyä Süriyädäge suğış başlanğannan birle ilenä kilgän 2 million yarım keşegä kürsätkän yärdäm häm qunaqçıllıqnı älbättä törekmännärgä dä kürsätäçäk. Berençe qorılğan çatırlarğa urın-cir taratıldı. “Qızılay”oyışması sıyınuçılarnı tuyındıru öçen qır aşxanälären eşlätä başladı. Balalarğa qışqı kiyem-salım häm ayaq kiyeme tarattı.
Bu drama älbät ber kön betär. Törekmännär qabat tuıp-üskän cirlärenä qaytır . Dönyada zolım belän mäñge yäşägän rejim yuq. Ber genä zolım da çiksez tügel. Süriyädäge wäzğiyät tä ber kön tözäler häm keşelär qabat üz yortlarına qaytır. Ütkännärdä isä Törkiyäneñ yıllar buyı berni söylämüçä başqarğan duslığı qalır. Tarix bu duslıq häm tuğanlıqnı üz bitlärenä yazar.
Bügenge yazmabızda Törkiyäneñ “Qızılay” yärdäm oyışmasınıñ matbuğat kiñäşçese Sälahättin Bostannıñ Bayırbucak törekmännäreneñ Süriyä rejim köçläre ,Rusiya häm İrannıñ yärdäme belän oyıştırılğan höcümnärdän soñğı wäzğiyäte xaqında fikerlären citkerdek. Tapşıruıbıznı törekmän komandirnıñ “Allah häm Törkiyä yanıbızda bulğanda törekmannärne beräw dä ciñä almayaçaq”digän süzläre belän tögällibez.
