Malayziyädä 16 meñ yıllıq keşe skeletı tabıldı

Malayziyäneñ Kelantan töbägendäge qazınu êşçänlekläre waqıtında 16 meñ yıllıq buluı uylanıluçı keşe skeletları tabıldı. Nenggiri üzänlegendä tikşerenü ütkärüçe arxeologlar ähämiyätle açış yasadı.

Malayziya milli universitetı professorı Zuliskändär Ramli citäkçelegendäge törkem üzänlekneñ 4 noqtasında 13 izvest’taş mäğaräsendä êşçänlek alıp bara. Alar 16 keşeneñ skeletına tap bula. İñ borınğısınıñ 16 meñ yıllıq buluı uylanuıla.

Nenggiri üzänlegendä arxeologik qazınular 2022nçe yılnıñ martında başlana häm 2023nçe yılnıñ oktyabrendä tögällänä. Andağı iñ ähämiyätle tabıldıq "Gua Keledung Kecil" dip ataluçı mäğarädän çıqqan tulı räweştä saqlanğan keşe skeletı. Anıñ 14-16 meñ yıllıq buluı farazlana. Professor Ramli: “Bu ildä tabılğan tulısınça iyelgän poziśiyädäge iñ kimçeleksez häm iñ borıñğı skelet”,-di. Ul skeletlarnıñ kübeseneñ neolit çorınnan êlekkege śivilizaśiyägä qaraqan şikelle kürenüen äytä. Alarnıñ 15e iyelgän yäisä tulısınça bögelgän poziśiyädä, berse isä töz yatqan kileş kümelgän. Tikşerenülär töz skeletnıñ neolit däwerenä qarawın açıqladı.  

Belgeçlär skelet qaldıqlarınıñ awçı-cıyuçı Xoabinxian śivilizaśiyäseneñ ber tarmağına qarawın uylıy.

Mäğarälärdä, monnan tış, êşkärtelgän taş êş qoralları, meñnärçä balçıq çülmäk kisäkläre häm taştan yasalğan bizänü äyberläre - barlığı 71 meñnän artıq borınğı äsär tabıla.