“TRT 12 Punto” büläkläre tapşırıldı

Kinematografiya ölkäsenä innovaŝiya kertü maqsatı belän Törkiyä teleradokompaniyase TRT tarafınnan bıyıl 5nçese oyıştırılğan “TRT 12 Punto” büläk tapşıru tantanası belän azağına yaqınlaştı.

Tantanada çığış yasağan TRT ğomum mödire Mäxmät Zahid Sobacı tübändägeçä citkerde: “Türkiyäneñ media oyışması bularaq kinematografiyagä birgän ähämiyätne tağın ber qat assızıqlarğa kiräk ikän; Türkiyädä bu tarmaqnı köçle räweştä xuplawıbızğa, kinoteatrlarda urtaq töşerelgän fil’mnarıbıznıñ küpläp qaraluına söyenäbez.”

Bıyıl 16-23 iyul’ könnärendä 22 ildän kilüçelär belän öç platformada oyıştırılğan sŝenariy yazu häm urtaq prodyusserlık platforması bulğan “TRT 12 Punto” büläk tapşıru tantanası belän tögällände.

“TRT 2” kanalında turıdan-turı kürsätelgän büläk tapşıru tantanasında TRT ğomum mödire Mäxmät Zahid Sobacı belän törki häm dön’ya kinematograiyasennän möhim isemnär qatnaştı.

TRT ğomum mödire çarada bolay dide: “Yäş’lär “12 Punto”da Türkiyä häm dön’ya kinematografiyasenä ireşä ala. Bu platforma kino industriyase belän bäyle böten närsäne üz êçenä ala. Bu tarmaqqa innovaŝiyalär kertä. Bıyıl TRT partnyerlığında töşerelgän dürt fil’m Kann, Veneŝiya, Sundance, Lokarno häm Roterdam kinofestival’läreneñ bäyge bülegenä saylap aluçılar belän oçraştı. Fil’mnarıbıznıñ yegermeşär minutlık montajları qaraldı. Kiläse yıllarda bu fil’mnarnı zur festival’lärdä kürü mömkinlegebez bulır dip ömetlänäm. Bıyıl “12 Punto”ğa 100dän artıq ozın metrajlı, 400gä yaqın qısqa metrajlı fil’m möräcäğat’ itte. Barlıq qatnaşuçılarğa xezmätläre öçen räxmät belderäm, êşlärendä uñışlar telim.”

“TRT belän urtaq töşerelgän fil’mnar soñğı 3 yılda qatnaşqan kinofestival’lärdä 236 büläk aldı. Milli häm xalıqara festival’lärdä dä buluıbız häm uñışlarıbız könnän-kön arta bara. Fil’mnarıbıznıñ çaralarda kürsätelgännän soñ Türkiyäneñ xalıqara sanlı platforması bulğan “tabii”dä dä urın alıp, küp keşegä barıp ireşüen äytergä telim. Şul räweşle “tabii” 2 aydan soñ 2 millionnan artıq keşedän toruçı zur ğailägä äylände. Bez tırışlıqlarıbıznı kinematografiyaneñ här ölkäsendä häm êtabında arttırıp, däwam itteräçäkbez,” – dide Mäxmät Zahid Sobacı.

Bıyıl Balkan geografiyasennän bik möhim qunaqlar qabul itülären äytkän ğomum mödir: “Serbiya, Xorvatiya, Çernogoriya häm Sloveniyaneñ fil’m üzäkläre başlıqları finalist bulğan proyektlarıbız belän tanışu häm üz illärendäge fond mömkinleklären añlatu öçen biregä kilde. Üzlärenä räxmätemne citkeräm; kiläse yıllarda Törek-Balkan partnyerlığındağı proyektlarnı kübräk küräçägebezgä ışanam,” – dip belderde.

Final tantanasında dön’ya kinematografiyasennän möhim 5 isemnän torğan jyuri äğzaläre rejissyer Danis Tanoviç, Oskar büläge iyäse Pol’şalı prodyusser Eva Pusçinska, Sarayevo kinofestivale qoruçısı Mirsad Purivatra, Doxa fil’m institutınıñ yuğarı däcäräle citäkçese Fatma Al-Remaixi häm Berlin kinofestivaleneñ Awrupa kinobazarı mödire Dennis Ruxnıñ bäyäläwläre näticäsendä ike proyektka “Xalıqara urtaq prodyusserlık büläge”, öç proyektka “TRT partnyerlığında prodyusserlık büläge”, öç proyektka “TRT aldan alu büläge” häm altı proyektka birelgän “Proyekt üsterü büläkläre” açıqlandı.

Büläklärne TRT ğomum mödire Mäxmät Zahid Sobacı, TRT ğomum mödire yärdämçese Möxämmäd Ziyad Varol belän jyuri äğzaläre Eva Pusçinska, Dennis Rux, Danis Tanoviç, Fatma Al-Remaixi häm Mirsad Purivatra proyekt iyälärenä tapşırdı.