Messi “Paris Sen-Jermen” komandasınnan kitä

Franśiyäneñ 1nçe Futbol Ligası törkeme “Paris Sen-Jermen” argentinalı yoldızı Lionel Messinıñ komandadan kitäçägen räsmi räweştä citkerde. Klubtan yasalğan “Räxmät, Leo” digän belderüdä mondıy yullar bar: “Başqalada uzğan 2 sezonnan soñ Messi belän PSGnıñ yulı 2022nçe-23nçe yıllar sezonı betkännän soñ ayırılaçaq. Klub Franśiyä Super Kuboğın häm ike 1nçe Liga çempionlığın qulğa töşergän 7 Altın tup iyäse Messiğa çın küñeldän räxmät äytä”.  

Yazmada Messinıñ fikerlärenä dä urın birelä. “Klubqa, Parij şähärenä häm anda yäşäwçelärgä bu ike yıl öçen räxmät äytäm. Alarğa kiläçäktä iñ yaxşısın telim” di ul.

Uzğan atnada çempionlığın iğ’lan itkän “Paris Sen-Jermen” , Messidan tış, İspaniya futbolçısı Serxio Ramosnıñ da komandadan kitüen beldergän ide.