Frida Kalonıñ çüpkä atqan räseme 8,63 million dollarğa satıldı

Böten dön’yada tanılğan Meksika rässamı Frida Kalonıñ oşatmıyça çüpkä atqan avtoportretı aukśionda 8 million 630 meñ dollarğa satıldı.

Ul älege äsären 1933nçe yılda yasıy häm “Avtoportret. Bik yäm’sez” dip atıy. Şunnan soñ rässam êşen çüpkä ırğıta. Tik dustı, şulay uq rässam, Lyus’yen Blox anı tabıp ala häm yäşeren räweştä sata. Şulay itep kartina bügengä qadär kilep citä.

Avtoportretnı pänceşämbe könne AQŞnıñ N’yu-York şähärendäge ber aukśionğa çığardılar. Frida bik siräk qullana torğan freska texnikası belän yasağan räsem öçen başta 7 belän 10 million dollar arasında bäyä farazlana. Häm ul 8 million 630 meñ dollarğa satıla.  

Uzğan yıl Frida Kalonıñ “Diyego häm min” dip ataluçı êşe 34 million 900 meñ dollarğa satılğan ide. Äsär sänğat’çeneñ bügengä qadär satılğan iñ qıymmätle räseme buldı.