Jerar Pike futbolnı taşlıy

İspaniyäneñ “Barselona” komandasında uynawçı Jerar Pike 5nçe noyabr’ şimbä könne bulaçaq matçta axırğı tapqır çirämgä çığaçağın, şunnan soñ futbolnı taşlayacağın xäbär itte.

35 yäş’lek futbolçı “Barselona” asqormasında citeşte häm 2008nçe yıldan birle A komandasında uynıy. Anıñ sezon urtasında professional kar’yerasına noqta quyuın sport cämäğat’çelege kötmägän ide.

Jerar Pike “Barselona” forması kiyep 15 sezonda tulayım 615 matçta uynadı häm 52 tup kertte.

Futbolçınıñ soñğı waqıtta sport kar’yerası tügel, kolumbiyäle cırçı Şakira belän mönäsäbätläre kön üzägendä ide.