Türkiyädä Bötendön’ya küçmä xalıqlar uyınnarı başlana

Bügen Türkiyäneñ İznik töbägendä Bötendön’ya küçmä xalıqlar uyınnarı başlana. Anı Bötendön’ya êtnosport konfederaśiyäse inde 4nçe tapqır oyıştıra. Berençese Qırğızstan ilbaşı Almazbek Atambayev citäkçelegendä 2014nçe yılda Çolpon Ata qalasında Issıq kül buyında uzğan ide. Yarışlarda 10 êtnosport töre buyınça köç sınaştılar.

Berençese uñışlı çıqqannan soñ, Qırğızstan 2016nçı häm 2018nçe yıllarda uyınnarnıñ ikençese häm öçençesen dä uzdırdı.

Xalıqara populyarlıq qazanğan yarışlarnıñ dürtençese 2020nçe yılda Türkiyädä uzarğa tiyeş ide. Koronavirus kizüe säbäple çara 2 yılğa kiçekterelde. Ul 29nçı sentyabr’dän 2nçe oktyabr’gä qadär İzniktä maxsus äzerlängän mäydanda uza.   

Uyınnarğa 102 ildän 3 meñnän artıq sportçı kilüe kötelä. Türkiyä waqıtı belän kiçke säğat’ 7dä başlanaçaq açılışta ilbaşı Räcäp Tayyip Ärdoğan da qatnaşa.  

Sport törlärenä kilgändä, alarnıñ 2se atlı, 3se uqçılıq belän bäyle, 8e isä köräş. Süz uñayınnan, aralarında tatar köräşe dä bar.

Uyınnarda sport qına tügel, mädäni çaralar da urın ala. İznik küle yarında tabiğat’ häm tarix bergä ürelgän mäydanda aşaw-êçü urınnarı, tradiśion qul êşlärennän êtno-bazar, säxnä, uqçılıqqa öyrätü, at menü  mäydançığı bulaçaq.

Teläwçelär yänäşädäge lager’ häm karavan-parklarda quna ala.