Bügen - Tuqayıbız tuğan kön

Bügen tatar milläte öçen iñ istälekläre könnärneñ berse – böyek şağıyrebez Ğabdulla Tukaynıñ tuğan köne. Ädip 1886nçı yılnıñ 26nçı aprelendä Tatarstannıñ Arça rayonı Quşlawıç awılında mulla ğailäsendä dön’yağa kilä. Bik küp mixnätlär kürep, yätimlekneñ äçesen tatıp, bärelep-suğılıp üsä bäläkäy Apuş. Bälki şul ayawsız yazmışı anda köräşçe ruxı tärbiyälägänder. Tuqay qaläme, şiğır’läre belän xalqıbız öçen, anıñ bäysezlege, irekle fikere öçen köräşä. 27 yıllıq qısqa ğına ğomere êçendä ul milllätebez kügendä yaqtı yoldız bulıp qabınırğa ölgerä. Ğabdulla Tuqay 400 dän kübräk şiğır, 9 poêma, 350 xikäyä, oçerk häm istäleklär yazıp qaldıra.

Bu könne Tatarstan xalqı häm, ğomumän, böten tatar dön’yası Tuğan tel könen bäyräm itä. Cömhüriyättä dä, çittä yäşäwçe tatarlar da törledän-törle çaralar uzdıra. Şularnın iñ danlıqlısı – Qazanda Tuqay häykäle yanında uzuçı Şiğ'riyät bäyräme. 

Çaralar Tuqay häykälenä çäçäk saludan başlanaçaq. Şunda uq köndezge säğat' berdän 3kä qadär Şiğ'riyät bäyräme uzaçaq.

Tradiśiyä buyınça, bu könne bäyräm konśertı waqıtında Ğ.Tuqay isemendäge Tatarstan cömhüriyäte Däylät  premiyäse laureatları iğ'lan iteläçäk. Anda Tatarstan ilbaşı Röstäm Miñnexanov ta qatnaşa. Bıyıl premiyägä 19 namzät täq'dim itelde.

Kamal teatrı qarşında yıl sayın ütkärelä torğan "Min tatarça söyläşäm" çarası uzaçaq. Anta tatarça al'ternativ muzıka başqaruçılarnıñ çığışları kötelä. 

Oluğ’ şağıyrebez tuğan kön belän, millättäşlär!