Matçta canatarlar suğıştı: ülüçelär barlığı belderelä

Meksikada Keretaro şähärendäge futbol matçı faciğa belän tögällänä

1790562
Matçta canatarlar suğıştı: ülüçelär barlığı belderelä

Meksikada 1nçe futbol ligasında “Keretaro” häm “Atlas” komandaları matçında tarafdarlarnıñ bäreleşüe näticäsendä şaqtıy keşeneñ ülüe turında süz bara.

Waqıyğa Keretaro şähärendäge Korrexidora stadionında bula. Uyınnıñ 63nçe minutında tribunalarda ike komandanıñ canatarları tartqalaşa başlıy. İminlek köçläre kürgän çaralar da bulışmağaç, uyın tuqtatıla.

Çiktän tış qotırğan tarafdarlar bar’yerlarnı uzıp futbol qırına kerä häm anda bäreleş başlana. Kameralardan kürengänçä, berniçä canatarnıñ qulında qoral da bula.

Meksika matbuğatında urın alğan xäbärlärgä qarağanda, bäreleşlär waqıtında kimendä 22 keşe yaralana häm qayberläreneñ xäle bik citdi.

Qayber xäbärlärdä isä stadion häm anıñ tiräsendä bulğan suğışlarda qunaq “Atlas” komandasınıñ 17 tarafdarnıñ ğomere özelüe alğa sörelä.

MX ligası räise Mikel’ Arriola bu waqıyğa nisbätennän disśiplina tikşerüe başlanuın häm poliśiyä wäqalätlelärenä kiräkle mäğ’lümatnıñ birelüen citkerde. Ul köç qullanunıñ qabul itelmäs buluın häm cawaplılarğa bik awır cäza bilgelänäçägen dä äytte.

Älege faciğa säbäple Meksikada 9nçı atnada qalğan matçlar tuqtatılıp tora.  



Bäyläneşle xäbärlär