Jamala Törkiyägä kilde

“Eurovision-2016” bäygesendä ciñgän qırım tatarı sänğat’çese Jamala Ukrainadağı suğış säbäple 2 balası belän Törkiyägä kilde. Ul İstanbulda jurnalistlar belän oçraştı. Cırçı Rusiyäneñ Ukrainağa höcümnäre turında söyläde.

“ Ukrainada ber ğayepsez tınıç xalıq könnär buyı bombalana. Kiyevta, Ukrainanıñ zur öleşendä xatın-qızlar, balalar, ölkännär häm grajdanlılar isän qalırğa tırışa,”-di ul.

Sänğat’çe Ukraina xalqına teläktäşlege öçen Törkiyägä häm il citäkçelegenä räxmäten belderde. “Törkiyä, ğasırlardan kilgän ğadät belän, bu çorda da, bernärsä kötmiçä, keşelek cawaplılığı toyıp häm vöcdanı quşqança işeklären bezneñ öçen açıp quydı,”-dide Jamala.  

Yäş’ sänğat’çe ike balası belän Törkiyägä kilgängä qadär çikkän qıyınlıqlar turında da añlattı. “Törkiyägä möhacir bularaq kiläçägemne hiç uylamağan idem,”-di ul.

Jamala Kiyevta 24nçe fevral’dä bomba tawışları astında uyanuların söyläde. Ul äbiseneñ, başqa qırım tatarları belän bergä, 1944nçe yılda yäşägän cirlärennän, watannarınnan kitärgä mäcbür buluların xäterlätep, üzenä dä şulay uq torğan ciren taşlap kitärgä turı kiläçägen berwaqıtta da uylamawın äytte.

Sänğat’çe suğışnıñ betüen teläwen citkerep: “İrem Ukrainada qaldı, min biregä tawışımnı işetterü öçen kildem. Çönki bu suğış betärgä tiyeş, härkem aña qarşı çığarğa tiyeş,”-dide.