3 balalı ğailä velosiped belän dön'ya gizä

Alar 3 meñ çaqrım ütep Törkiyägä kilep citte

1736872
3 balalı ğailä velosiped belän dön'ya gizä

3 ay êlek 3 balası belän Awrupa häm Aziyä turına çıqqan franśuz ğailäse pedal’ äyländerep Törkiyäneñ Kon’ya töbägenä kilep citte. Alar Bäyşähir rayonında yal itärgä tuqtaldı.  

Franśiyädä yäşäwçe velosiped fanatları 41 yäş’lek Remi häm xatını 40 yäş’lek K’yara dön’ya gizärgä uylıy. Monıñ öçen alar aqça cıya häm yäşägän öylären arendağa birä. Balaları - 10 yäş’lek Tomas, 8 yäş’lek Romane häm 5 yäş’lek Êliznı da alıp yulğa quzğalalar.    

Remi Vallin jurnalistlarğa söylägänçä, ğailä avgust ayında yulğa çıqqan. İtaliyä, Sloveniya, Xorvatiya, Qarataw, Albaniya häm Greśiyäne ütep Törkiyägä kilep citkännär. Kon’yağa qadär yaqınça 3 meñ çaqrım velosidep pedale äyländergännär.

Vallin Törkiyädän soñ İran, Omman yäisä Tailand häm Qıtayğa barırğa planlaştıruların belderde. Qıtaydan isä Transseber poyızdı belän Rusiyä aşa Franśiyägä qaytırğa uylıylar.

Vallin Törkiyäne häm mondağı xalıqnı oşatuların assızıqladı.

“Bez bernärsä soramıybız, alar soraşa, gel berär närsä täq’dim itä. “Aşıysığız kiläme, berär närsä kiräkme?”- dip sorıylar. Törkiyäneñ tabiğat’ manzaraları, şähärläre bik kürkäm, keşeläre dustanä. Üzebez ütkän illär arasında iñ yaxşı keşelär biredä oçradı,”-dip söyläde ğailä başlığı.



Bäyläneşle xäbärlär