"Ul soñğı uqnı atuıñnı yäş’le küzlärem belän qaradım"

Tokio Olimpiya uyınnarında uq atuda Törkiyägä täwge altın medal’ne Mätä Gazoz yawladı.  Anı ilbaşı Räcäp Tayyip Ärdoğan telefonnan şaltıratıp qotladı. “Bezne bik nıq dulqınlandırdıñ. Tarixnı qabat ayağına bastırdıñ. Törek milläteneñ uqçı onığı bularaq tarix yazdıñ. Ul soñğı uqnı atuıñnı yäş’le küzlärem belän qaradım. Qotlıym,”-dide sportçığa ilbaşı.

Mätä Gazoz olimpiya uyınnarınıñ 8nçe könendä klassik cäyä buyınça şäxsi finalda İtaliyädän Mauro Nespolinı 6-4 isäbe belän ciñde häm altın medal’gä layıq buldı.  

22 yäş’lek törek sportçısı 29nçı iyül’ pänceşämbe könne uzdırılğan täwge tur matçında lüksemburglı Djeff Xenkelsnı, ikençe turda isä avstraliyäle Rayan Tyaknı ciñde.

Uqçı irtänge seansta soñğı 16nçı turda Avstraliyädän Teylor Yorttan östen çıqtı häm çirek finalğa qaldı. Anda isä Mätä Gazoz dön’ya isemlegendä 1nçe nomerlı uqçı - AQŞtan Bredi Êllisonnı töşerep qaldırdı häm üz isemen yarım finalğa yazdırdı.   

Yarım finalda törek sportçısı yapon Takaxaru Furukawanı ciñep finalda italyan Mauro Nespoli belän altın medal’ öçen köräşergä çıqtı. Mätä Gazoznıñ köndäşe Londonda 2012nçe yılda altın medal’ alğan, Dön’ya häm Awrupa çempionı. Milli uqçı, şulay da, annan östen çıqtı. Mätä Gazoz 6-4 isäbe belän ciñep berençelekne yawladı.