Latin amerikalılar balalarına törek isemnäre quşa
Anda törek serialların qaraw rekord däräcädä
Latin Amerikası däwlätlärendä törek serialları belän qızıqsınu şul däräcägä citte ki, balalarına andağı isemnärne birä başladılar. Mäsälän, Paragvayda yaña tuğannarnı terkäwçe räsmi “Registro Del Estado Civil” oyışması Twitterda watandaşlarnıñ balalarına seriallardan alıp birgän qayber isemnäre belän urtaqlaştı. Anda Şäxrazad, Kärim, Kämal, Dävran häm Mostafa şikelle isemnär urın ala. Oyışma bolarnıñ törek romannarı häm serialları belän ilhamlanğan äti-änilärneñ êşe buluın da äytä.
Törkiyä serialları 2015nçe yıldan başlap Latin Amerikası illärendä qaraw rekordları yasadı. Älege xäräkät başta Çilidä küzätelde. Anda törek serialların qarap yaña tuğan balalarğa törekçä isemnär birä başladılar. Monnan tış, Latin Amerikasında uzuçı törle çaralarğa törek artistların çaqıru modada.
