"Titanik"nı saqlayaçaqlar
Angliyä belän AQŞnıñ röxsätennän başqa anıñ cimereklärenä kerü tıyıla
1912nçe yılda aysbergka bärelep batqan zinnätle yulçı korabı “Titanık”nıñ qaldıqları Angliyä häm AQŞ arasında tözelgän kileşü nigezendä saqlanaçaq.
Böyekbritaniyä transport ministrlığınıñ belderüenä qarağanda, Angliyä kileşüne 2003nçe yılda, AQŞnıñ däwlät särqatibe Mayk Pompeo isä 2019nçı yıl axırında raslağan. Xäzer ul ğamälgä kerde.
Kileşü nigezendä, korab cimerekläre êçenä kerü yäisä andağı äyberlärne alıp çığu Angliyä häm AQŞ xökümätläreneñ röxsäte belän genä mömkin.
Angliyä diñgezçelek ministrı Nusrat Gani bolay dip belderde: “Qaldıqlarnı saqlaw öçen AQŞ belän tözelgän bu ähämiyätle kileşü 1500dän artıq keşeneñ mäñgelek yoqılarınıñ xörmät häm sizgerlek belän möğamälä küräçägen añlata”.
Gani Angliyäneñ cimereklärne tağın da nığraq saqlaw öçen başqa Tön’yaq Atlantik däwlätläre belän yaqın xezmättäşlek itep êşçänlek alıp baraçağın äytte.
“Titanik” 1912nçe yılda Angliyäneñ Sautgempton şähärennän AQŞnıñ N’yu-York qalasına täwge säfäre waqıtında aysbergqa bärelep battı. Hälakättä 1514 keşeneñ ğomere özelde. Korabnıñ cimerekläre 1985nçe yılda xalıqara sularda tabıldı, ämma saqlaw astına alınmadı.
