Avstraliyädä "dinozavr ağaçları"n yanğınnan saqlap qaldılar

Avstraliyädä aylar buyı kontrol’gä alınmağan yanğınnarda “dinozavr ağaçları” bularaq ta bilgele Wollemi naratları üsüçe mäydannı yalqınnan saqlarğa tırıştılar. Bu dön’yada bilgele bulğan iñ borıñğı ağaçlar. Tarixları bik tirängä barıp totaşuçı bu naratlarnıñ sanı 200dän azraq. Alar Sidneynıñ Zäñgär tawlar töbägendä urnaşqan.

Avstraliyä milli parklar häm qırğıy tormış xezmätläre direktorı David Krast yanğın sünderüçelärneñ Wollemi naratları üzänlegen hawadan su tügep saqlap qaluın belderde. Ul älege ağaçlarnıñ ähämiyätle buluın assızıqladı. “Bu Wollemi naratları tabılğan berdänber urın häm alarnıñ sanı bik az,”-dide ul.

Yaña Kön’yaq Uêl’s ştatı êkologiyä ministrı Mêtt Kin da qayber üsemleklärneñ zarar kürüen, şulay da operaśiyä yärdämendä alannı saqlap qaluların äytte. Ul ağaçlarnı saqlaw öçen alarnıñ üskän urının yäşerep totaçaqların da citkerde.