Piter Xandke - persona non-grata
Nobel' büläge alğan yazuçını Sarayevoda telänmägän keşe iğ'lan ittelär
Bosniyädäge genośidnı kire qağuçı Nobel’ büläge iyäse Piter Xandke Sarayevoda telänmäwçe keşe bularaq iğ’lan itelde. Yazuçı Srebreniśadağı qanlı waqıyğalarnı inkyar itüe häm serb liderı Slobodan Miloşeviçnı yaqlawı belän tanıldı. Ul 8 meñ bosniyäle möselmannıñ üz-üzen üterep ğayepne serblar östenä atuların söyläwe belän cämäğat’çelekne tañ qaldırğan ide. Xandkenıñ bıyıl Nobel’ premiyäsen aluına rizasızlıq belderülär tuqtamıy.
Sarayevo kanton parlamentı Bosniyäle demokratik ğamäl partiyäseneñ täq’dime belän tawış birep Xandkenı şähär çikläre êçendä “persona non-grata” dip iğ’lan itte.
Parlamenttan yasalğan belderüdä Nobel’ premiyäse iyäse Xandkenıñ Bosniyädäge genośidnı inkyar itüeneñ “soñğı noqta” buluı äytelä. “İñ naçarı - Piter Xandkenıñ ütkändäge inkyarçı fikerlären bügen dä üzgärtmäwe,” - di bosniyälelär.
