Êfiopiyädä 2012nçe yıl başlandı

Afrikanıñ borıñğı śivilizaśiyälärennän berse bulğan Êfiopiyä bügen 2012nçe yılğa kerde. Däwlät üzgä kalendar’ häm säğat’ sisteması qullanuı belän dön’yanıñ başqa poçmaqlarınnan ayırılıp tora.

Yılnıñ täwge köne “Ênkutataş” dip atala. Ul könne il külämendä yal iğ’lan itelä. Şulay uq, yıl başında törmälärdä amnistiyä yasaw da tradiśiyägä kergän. Bıyıl ul 8 meñ mäxkümgä qağıldı.

Ênkutataş yawım-töşem fasılınıñ tögällänüe häm igen cıyu çorı bularaq qabul itelä. Ul Êfiopiyä kalendareneñ täwge ayı Mäskärämneñ berençe köne.

İldä yaña yılnıñ simvolı sarı romaşka çäçäkläre. Anı “Adey Adaba” dip atıylar. Näq’ menä şul çorda cıyuluçı çäçäk üzennän -üze älege bäyräm belän assośiyäśiyäläşä başlağan.

Êfiopiyä kalendare Qoyaşqa nigezlänä. Ul biredä yäşäwçe häm Êritreya xristiannarınıñ dini kalendare dä. Anıñ Misırdağı kopt xristiannarınıqı belän dä oxşaşlığın belderälär. Êfiopiyä kalendare miladi yıl sanawdan yaqınça 7 yıl 8 ay artta qala. Anda 13 ay bar. 12se 30 könnän tora. 13nçese isä artıp qalğan 5-6 könne üz êçenä ala.  

Êfiopiyä kalendareneñ başqalardan ayırılıp toruınıñ säbäbe Ğaysä päyğambärneñ tuuın ayırım xisaplawları.  

Êfiopiyä xalqı säğat’ sistemasın da başqa törle qullana. Alar öçen kön 00 säğat’ 00 minutta tügel, irtänge 6da başlana.

Kön 12 säğat’lek 2 ayırım öleştän tora. Berençese säğat’ 6da başlansa, ikençese - 18dä.