“Äydä, äydä, Gölnara”

Änkarada uzğan marafonda Tatarstan bayrağın kütärgän yarışçı aldan kilde

“Äydä, äydä, Gölnara”

Änkarada uzğan marafonda tatar qızı aldınğı urınğa çıqtı. Xäzerge waqıtta Törkiyädä yäşäwçe Gölnara Zıyatdinova 21,1 kilometrğa yögerüdä 2nçelekne yawladı. “Bu minem tuğızınçı yarımmarafonım. Qazan, Mäskäw, İstanbul, Vena, Barselona şähärlärendä 21,1 kilometrğa yögerdem. Menä xäzer Änkara da isemlekkä kerde. 2 tapqır tulı marafon, yäğ’ni 42,2 çaqrımğa yögergänem bar. Aları İstanbul häm Mäskäwdä ide,”-dip söyli sportçı üze.

Gölnara Zıyatdinovanıñ äle ike atna êlek kenä dä sośial’ çeltärdä yarış räsemnäre kürengän ide. İñenä Tatarstan bayrağın salğan yarışçı İstanbuldağı yarımmarafonda töşkän. Anda ul tizräk yögergän. 1 säğat' 59 minutta kilgän. Änkarada şul uq aranı 2 säğat' 1 minutta uza häm üz yäş’ kategoriyäsendä 2nçe bula. Gölnara äytüençä, Änkarada bu yarış ikençe tapqır ğına ütkärelä - İstanbuldağı şikelle tanılu almağan. “Bu şähärdä yäşägäç, keşe sanı öçen genä bulsa da yögerim didem,”-di ul häm sınatmıy.

Täcribäle yarışçı oyıştıru êşlärenä dä bäyä birde. Gölnara fikerençä, Rusiyädä mondıy çaralar tağın da äybäträk uza. Atmosfera başqa. “Rusiyädä sportnıñ bik üskän çağı - marafon anda bäyräm kebek, -dip söyli ul. - Köç birep toruçı törkemnär, qullarına plakatlar totqan tamaşaçılar… Qazanda, mäsälän, minem böten tuğannarım trassa buyınça tezelä ide. Kötmägändä berärse siña “Äydä, äydä, Gölnara” dip qıçqıra häm üzeñdä köç artqanın sizäseñ”.

Gölnara Zıyatdinova marafonda tıştan waq bulıp kürengän närsälärneñ dä bik ähämiyätle buluın assızıqlıy. Mäsälän, Änkarada startnı 20 minutqa soñğa qalıp birgännär. Ä bit sportçılar aldan cılınıp quya häm bu waqıt êçendä gäwdä qabat suınıp ölgerä. Trassada sularnıñ citärlek äzerlänmäwe dä ähämiyätle kimçelek. Şulay da, Gölnara marafonnıñ Änkarada ütkärelä başlawına söyenä. “İnşallax, yıldan-yıl äybätlänä barır. Keşelär dä monı işetep, qızıqsına başlar,”-di ul.   



Bäyläneşle xäbärlär