Natali Portman İzrailne rasaçılıqta ğayepläde

"Yähüd milli däwläte qanunı yalğış äyber häm min aña quşılmıym"

1106307
Natali Portman İzrailne rasaçılıqta ğayepläde

Yähüd çığışlı amerikalı aktyer Natali Portman İzrail parlamentınıñ iyül ayında qabul itkän bäxäsle Yähüd milli däwläte qanunın “rasaçıl” bularaq bäyäläde. Ul London üzäkle ğaräpçä yazuçı “Al-Kuds Al-Arabiya” gazetına interv’yu birde. Gollivud yoldızı: “Ul (Yähüd milli däwläte qanunı) yalğış äyber häm min aña quşılmıym. Kürşelärebezne çınlap torıp yarata aluıbıznı häm alar belän bergä yäşäw mömkin buluın sanıym,”-dide.

“Yähüd Nobele” sanaluçı häm kiläse näsel yähüdlärgä ilham çığanağı bulaçaq dön’yaküläm tanılğan şäxeslärgä birelüçe “Genesis büläge”nä bıyıl Natali Portman layıq bulğan ide. Ämma Oskarlı yoldız 2 million dollarlıq büläktän baş tarttı.  

Portman tantanağa İzrail prem’yer-ministrı Bin’yamin Netan’yaxuğa boykot belderüe öçen barmawın da äytte. Şunnan soñ bıyılğı Genesis bülägen tapşıru tantanasın ütkärmädelär.

İzrail parlamentında 19nçı iyül’dä qabul itelgän “Yähüd milli däwlät qanunı” ike törle watandaş modelen küzdä tota. Anıñ nigezendä, il xalqınıñ 20%ı bulğan ğaräplär ikençe sıynıf watandaş däräcäsenä töşäçäk. Monnan tış, ğaräp tele räsmilegen yuğalttı häm berdänber däwlät tele itep ivrit iğ’lan itelde.

Qanunnıñ iñ nıq rizasızlıq tudırğan başqa maddäsendä şundıy yullar bar: “İldä üzbilgelänü xoquqına barı tik yähüdlär iyä. İzrail dön’yadağı barlıq yähüdlärneñ töp watanı. Dön’yadağı barlıq yähüdlärneñ İzrailgä qaytu xoquqı bar. Yähüdlärneñ dini dataları räsmi yal bulaçaq. İzrailneñ başqalası Qudüs”

Qanunda urın alğan “İzrail böten dön’yadağı yähüdlärneñ tarixi watanı” cömläse fälästinlelärneñ bu cirlärdäge tarixi barlığı häm xoquqları belän sanlaşmawların kürsätä.



Bäyläneşle xäbärlär