Ğazzädä fil'm festivale

Ğazzädä bıyıl 4nçe tapqır Qızıl keläm fil’m festivale başlandı. Anıñ açılışında İzrail xärbiläre tarafınnan üterelgän fälästinle jurnalist Yasir Murtäca rejissyerlığında töşerelgän kinokartina kürsätelde. Ul ber yäş’ qıznıñ AQŞtağı universitetta uquın däwam itü öçen 1 yıl buyınça Ğazzädän çığarğa tırışuın tasvirlağan “İke çik arasında” fil’mı. Oyıştıruçılar, şulay itep, Murtäcanıñ xıyalın tormışqa aşırdı. Ul üzeneñ fil’mın xalıqara festival’lärdä kürsätergä telägän.

Çaranı Ğazzädäge kino şirkätläre oyıştırdı. 4 kön däwam itäçäk festival’dä 50 cirle, töbäk häm xalıqara fil’m kürsäteläçäk.

Açılış Qızılay kinozalında ütte. Anda küp sanda fil’m töşerüçelär häm jurnalistlar qatnaştı.

Festival’ qısalarında Ğazzädäge fälästinlelärneñ İzrail höcümnäre säbäple kiçergän qıyınlıqları xaqında söylägän fil’m da kürsäteläçäk.

Älege fil’m festivale täwge tapqır 2014nçe yılda Ğazzäneñ Äş-Şucaiyyä mäxälläsendä oyıştırıldı. Qızıl kelämne İzrail tarafınnan cimerelgän yözlärçä yortnıñ xaräbäläre östenä cäygännär ide.

Ğazzädä 2000nçe yıldan birle kinozallar êşlämi.