Çanakkalädä antik şähär

3 yıl êzlägännän soñ borınğı häm bay şähär tabıldı

1092213
Çanakkalädä antik şähär

Çanakkalädä 2 meñ 700 yıllıq borınğı şähär tabıldı. Arxeologlarnıñ anı êzläwe 3 yıl däwam itä. Tabılğan şähär Limnai dip atala. Çanakkalä unsigezençe mart universitetınnan belderülärençä, borınğı çığanaqlar buyınça qalanıñ barlığı bilgele bulğan, ämma urının açıqlıy almağannar. Anı tabu öçen Toz küle tiräsendä arxeologik qazınular ütkärelgän.  Şähärneñ Bäşyol üzänlegendä buluı açıqlana.

Tarixçılar äytüençä, qalağa İoniyadan kilüçe qaçaqlar nigez salğan. Ul Rim çorına qadär barlıqqa kilgän. Bu qala ul waqıtta Gälibolu yarımutrawınıñ iñ bay şähärlärennän berse bulğan. Limnai - bügengä qadär yarımutrawda tabılğan 5nçe antik şähär.

Tarixçılar Gälibolu cirlegeneñ arxeologik añlamda zur potenśialğa iyä buluın assızıqlıy. “Qaladağı arxitektura qaldıqları bötenläye belän tufraq astında bulğanı öçen cir östendä barı tik balçıq çülmäk häm plitä öleşlären kürä alabız. Läkin bu kisäklär dä bezgä şähärneñ mäydanı, qayçan nigez salınuı häm qaysı çorda taşlandıq xälgä kilüe turında mäğ’lümat birä,”-di arxeologik törkemneñ citäkçese Räyxan Körpä.



Bäyläneşle xäbärlär