Dön’yanıñ iñ biyek häykällärennän berse açıldı

182 metrlı häykäl Hindstannıñ ber awılında urnaşqan

1078736
Dön’yanıñ iñ biyek häykällärennän berse açıldı
hindistan patel heykel2.jpg
hindistan patel heykel1.jpg

Hindstanda bäysezlek köräşe liderı Sardar Vallabbxay Patel’neñ bronzadan qoyılğan häykäle açıldı. Ul dön’yanıñ iñ ozın häykälläre isemlegendä - biyeklege 182 metr. Anı yasaw 403 million dollarğa töşä.  

Monument Gudjarat töbägendäge Kevadiyä awılında Narmada yılğası yarında urnaşqan. Anı Hindstan xökümäte räise Narendra Modi açtı. Tantana waqıtında oçqıçlar hawadan “Berlek häykäle”nä çäçäklär attı.

Häykäl - hind sınçısı Ram Sutarnıñ äsäre. Anıñ bu qadär qıymmät buluı tänğıyt’ utına totılsa da, xökümät räise êşne tuqtatmadı. Ul krizis çorında Hindstanğa yul kürsätüçe bulğan Patel’neñ kiläçäk buınnarğa ilham birep toraçağına ışana.

Cirle matbuğat çaralarında çıqqan xäbärlärdä açılış tantanası waqıtında töbäkkä meñnärçä poliśiyä xezmätkäre kiterelüe häm rizasızlıq çarasına çıqqan fermerlar belän aktivistlarnın qulğa alınuı turında yazalar.  

Häykäl yanında Patel’neñ tormışı häm êşçänlege belän bäyle tikşerenü üzäge, 2 meñ fotoräsem häm 40 meñ dokument saqlawçı muzey da bulaçaq.

Patel’ - 1947nçe yılda Angliyä kolonistları ildän kitkännän soñ Hindstannıñ täwge êçke êşlär ministrı bula. Anı “timer keşe” dip tä yörtälär. Patel’ bäysezlektän soñğı çorda törle töbäklärneñ berläşüendä möhim rol’ uynıy.


 



Bäyläneşle xäbärlär