Montserrat Kabal’ye wafat

İspaniyäneñ mäşhür sopranosı, dön’yaküläm tanılğan Montserrat Kabal’ye bügen 85 yäşendä baqıylıqqa küçte. Ul sentyabr’ ayınnan birle Barselonada xastaxanädä yatqan. İspaniyä matbuğatında yazılğança, anı üt quığındağı awırtuı köçäygäç salğannar. Opera divasınıñ üleme härkem öçen kötelmägän buldı. Çönki anıñ çire citdi bularaq bäyälänmi ide häm tizdän xastaxanädän çığuı kötelde. Tuğannarı sänğat’çeneñ ülem säbäben söylämäskä qarar birgän.

İspaniyä xökümäte räise Pedro Sançes Twitterda: “İlebezneñ ähämiyätle ber wäkile wafat buldı. Tawışı häm mölayımlığı bezneñ belän mäñgegä qalaçaq” -dip yazdı.

Kabal’ye “Kuin” rok törkemeneñ vokalistı Freddi Merkuri belän yazdırğan häm Merkuri ülgännän soñ 1992nçe yılda çıqqan “Barselona” isemle al’bomı häm şul uq isemdäge cırı belän tanıldı.  

Opera cırçısı 1933nçe yılda tuğan. Ul icat tormışı buyınça yaqınça 4 meñ tapqır säxnädä quyılğan 90 opera spektaklendä töp rol’ne başqara.

Montserrat Kabal’ye BMOnıñ yaxşı niyät ilçese dä ide. Barselonada moxtac balalar öçen cämğıyät’ tözede.